وزیرِاعظم آزاد کشمیر کو سیاسی بحران کا سامنا

ذرائع کے مطابق پیپلز پارٹی کا فیصلہ صدرِ مملکت آصف علی زرداری جبکہ مسلم لیگ (ن) کا فیصلہ وزیرِاعظم شہباز شریف کی منظوری سے مشروط ہے۔

مسلم لیگ (ن) آزاد کشمیر کے صدر شاہ غلام قادر نے کہا ہے کہ چوہدری انوارالحق حکومت چھوڑ کر اب اپوزیشن میں بیٹھیں گے۔ ان کے مطابق آزاد کشمیر میں حکومت سازی پیپلز پارٹی کا حق ہے، اگر ضرورت پڑی تو پیپلز پارٹی کو ووٹ دیا جائے گا لیکن حکومت میں شامل نہیں ہوں گے۔

ادھر پیپلز پارٹی آزاد کشمیر کے ارکانِ اسمبلی کا اہم اجلاس آج زرداری ہاؤس کراچی میں طلب کر لیا گیا ہے، جس کی صدارت فریال تالپور کریں گی۔ اجلاس میں سابق وزیرِاعظم راجہ پرویز اشرف اور قمر زمان کائرہ کو خصوصی دعوت دی گئی ہے۔

ذرائع کا کہنا ہے کہ اگر آج وزارتِ عظمیٰ کے امیدوار کا اعلان کر دیا گیا تو تحریکِ عدم اعتماد کی ضرورت پیش نہیں آئے گی۔