حکومت اورعوامی ایکشن کمیٹی کےمذاکرات کامیاب،معاہدہ طے پاگیا

ذرائع کے مطابق مذاکرات کا پہلا دور تقریباً دو گھنٹے جاری رہا، جس کے بعد عوامی ایکشن کمیٹی کے رہنماؤں نے دھیرکوٹ میں اپنے ساتھیوں سے مشاورت کے لیے وقت مانگا تھا۔ بعدازاں دوسرا دور بھی خوشگوار ماحول میں منعقد ہوا۔

وزیر مملکت طارق فضل چوہدری نے سوشل میڈیا پر بتایا کہ وزیراعظم شہباز شریف کی ہدایت پر بھیجی گئی حکومتی ٹیم نے کشمیری عوام کے بیشتر عوامی مفاد سے متعلق مطالبات تسلیم کر لیے ہیں، جبکہ باقی چند مطالبات کے لیے آئینی ترامیم درکار ہیں جن پر بات چیت جاری ہے۔

طارق فضل چوہدری کے مطابق حکومت کا مؤقف ہے کہ تشدد کسی مسئلے کا حل نہیں، اور توقع ظاہر کی گئی ہے کہ تمام معاملات پُرامن مذاکرات کے ذریعے طے پائیں گے۔ انہوں نے کہا کہ ’’آزاد کشمیر زندہ باد اور پاکستان پائندہ باد ہمارا مشترکہ عزم ہے‘‘۔

ابتدائی مذاکرات کے بعد میڈیا سے گفتگو کرتے ہوئے وفاقی وزیر احسن اقبال نے کہا کہ حکومت آزاد کشمیر میں امن و استحکام چاہتی ہے کیونکہ دشمن ملک ہمیشہ عدم استحکام سے فائدہ اٹھانے کی کوشش کرتا ہے۔

وفاقی وزیر امیر مقام نے کہا کہ بات چیت خوشگوار ماحول میں ہوئی اور مسائل کو باہمی افہام و تفہیم سے حل ہونا چاہیے۔

عوامی ایکشن کمیٹی کے رہنماؤں نے بھی مذاکرات کے بعد اپنے دیگر ساتھیوں سے مزید مشاورت کے لیے وقت طلب کیا۔ قمر زمان کائرہ نے کہا کہ ہم اپنے ساتھیوں کے جائز مطالبات میں ان کے ساتھ کھڑے ہیں اور وزیراعظم شہباز شریف ذاتی طور پر اس معاملے کو دیکھ رہے ہیں۔