گلوبل صمود فلوٹیلا پر اسرائیلی فوج نے حملہ کردیا

فلوٹیلا کے منتظمین نے ہنگامی حالت کا اعلان کیا اور اپنی کشتیوں پر لائیو ویڈیو فیڈ فعال کی تاکہ کسی بھی ممکنہ کارروائی کی صورت میں فوری عالمی ردعمل سامنے آئے۔ اطلاعات کے مطابق متعدد کشتیوں کے لائیو فیڈ اچانک بند ہوگئے، جس پر شبہ ظاہر کیا جا رہا ہے کہ اسرائیلی بحریہ کی کارروائی کے نتیجے میں یہ ہوا۔

اسرائیلی وزیر خارجہ نے فلوٹیلا کو سفر روکنے کی وارننگ دی، جبکہ اسرائیلی جہازوں نے دو کشتیوں کا گھیراؤ کر کے مواصلاتی آلات جام کر دیے۔ اسرائیلی میڈیا کے مطابق بعض کشتیوں کو سمندر میں ڈبونے کا بھی منصوبہ ہے۔

اس دوران اسپین، اٹلی اور یونان نے اسرائیل سے مطالبہ کیا کہ فلوٹیلا کے افراد کو نقصان نہ پہنچایا جائے۔ اقوام متحدہ کی نمائندہ برائے انسانی حقوق اور کولمبیا کے صدر نے بھی کہا کہ امدادی بیڑے کو بغیر رکاوٹ غزہ تک پہنچنے دیا جائے۔

اطلاعات کے مطابق اسپین اور اٹلی کے جہاز فلوٹیلا کے ساتھ موجود ہیں تاکہ سفر محفوظ بنایا جا سکے، جبکہ ترکی کے ڈرونز فضاء میں نگرانی کر رہے ہیں۔ تاہم اٹلی نے اعلان کیا کہ اس کا جنگی جہاز واپس لوٹ جائے گا۔

سیاسی مبصرین کا کہنا ہے کہ اگر اسرائیل نے فلوٹیلا کو نشانہ بنایا تو اس سے خطے میں ایک بڑا انسانی اور سفارتی بحران پیدا ہو سکتا ہے۔

فلوٹیلا پر سابق سینیٹر مشتاق احمد خان بھی موجود ہیں۔