ڈیرہ اسماعیل خان:سیکیورٹی فورسز کی کارروائی میں7 خوارج ہلاک

راولپنڈی: سیکیورٹی فورسز نے ڈیرہ اسماعیل خان کے علاقے کلاچی میں خفیہ اطلاع پر کارروائی کرتے ہوئے 7 دہشت گردوں کو ہلاک کر دیا۔ مارے جانے والوں میں تین افغان اور دو خودکش بمبار بھی شامل تھے۔

آئی ایس پی آر کے مطابق یہ آپریشن 20 ستمبر کو اس وقت کیا گیا جب علاقے میں بھارتی حمایت یافتہ گروہ "فتنۃ الخوارج” کی موجودگی کی اطلاع ملی۔ علاقے کو کلیئر کرنے کے لیے سرچ اور سینیٹائزیشن آپریشن جاری ہے تاکہ دیگر دہشت گردوں کا بھی خاتمہ کیا جا سکے۔

بیان میں مزید کہا گیا کہ توقع ہے افغان حکومت اپنی ذمہ داری نبھائے گی اور اپنی سرزمین کو پاکستان کے خلاف استعمال ہونے سے روکے گی۔ پاک فوج نے دوٹوک مؤقف اپنایا ہے کہ وہ ملک کو بھارتی سرپرستی میں ہونے والی دہشت گردی سے پاک کرنے کے لیے پرعزم ہے۔

وفاقی وزیر داخلہ محسن نقوی نے اس کامیاب کارروائی پر سیکیورٹی فورسز کو خراجِ تحسین پیش کیا۔ انہوں نے کہا کہ فورسز نے ایک بار پھر خیبرپختونخوا میں خوارجیوں کے منصوبے ناکام بنائے اور قوم ان کی قربانیوں کو قدر کی نگاہ سے دیکھتی ہے۔ محسن نقوی نے مزید کہا کہ دہشت گردوں کو ملک میں کہیں بھی چھپنے کی جگہ نہیں ملے گی۔