سوات کی تحصیل کبل کے علاقے ننگولئی میں ہفتہ کی رات نامعلوم مسلح افراد نے عوامی نیشنل پارٹی (اے این پی) کے سرگرم رہنما، وی ڈی سی ممبر اور ویلج کونسل ننگولئی کے چیئرمین فتح اللہ خان پر اندھا دھند فائرنگ کر دی۔ حملے کے نتیجے میں فتح اللہ خان اور ان کے ہمراہ موجود ساتھی فرمان شدید زخمی ہو گئے جنہیں فوری طور پر سیدوٹیچنگ ہسپتال منتقل کیا گیا، تاہم دونوں زخموں کی تاب نہ لاتے ہوئے دم توڑ گئے۔
واقعے کے فوری بعد پولیس موقع پر پہنچ گئی، جائے وقوعہ کو گھیرے میں لے کر شواہد اکٹھے کیے گئے۔ پولیس حکام کے مطابق علاقے میں سرچ آپریشن شروع کر دیا گیا ہے اور مشتبہ افراد کی تلاش کے لیے تمام داخلی و خارجی راستے سیل کر دیے گئے ہیں۔
عوامی نیشنل پارٹی کے رہنماؤں نے واقعے کی شدید مذمت کرتے ہوئے کہا ہے کہ یہ حملہ جمہوریت اور امن پسند آوازوں کو دبانے کی گھناؤنی کوشش ہے۔
۔۔۔۔۔۔
