پیپلزپارٹی پنجاب کی تنظیم بلاول بھٹو کے سامنے مریم نواز کی صوبائی حکومت کے خلاف پھٹ پڑی اورشکایات کےانبارلگادیئے۔
تفصیلات کے مطابق پی پی کے چیئرمین بلاول بھٹو زرداری سے ملاقات میں پیپلزپارٹی پنجاب کے عہدیداران مریم نواز حکومت کے خلاف پھٹ پڑے اور شکایات کے انبار لگا دئیے۔ ارکان نے شکوہ کیا کہ پنجاب حکومت نہ ارکان اسمبلی کو اہمیت دیتی ہے اور نہ ہی بیوروکریسی سے تعاون کر رہی ہے۔
اُن کا کہنا تھا کہ لگتا ہے پنجاب کی انتظامیہ کو پی پی کے بارے میں خصوصی ہدایات ملی ہیں۔پیپلز پارٹی ارکان پنجاب اسمبلی کے ترقیاتی کام نہیں کیے جا رہے ہیں۔ پی پی ارکان صوبائی اسمبلی کا مزید کہنا تھا کہ پنجاب حکومت تحریری معاہدے پر پیش رفت نہیں کر رہی۔ بلاول زرداری پی پی پنجاب کے تحفظات وزیراعظم کے سامنے رکھیں۔
بلاول بھٹو پی پی پنجاب کے اراکین کے تحفظات نوٹ کرتے رہے۔ بلاول زرداری نے پنجاب حکومت کے رویے پر حیرانگی اور پریشانی کا اظہار کیا اور پی پی پنجاب کے تحفظات وزیراعظم تک پہنچانے کی یقین دہانی کرائی۔ دوسری جانب بلاول زرداری کی وزیر اعظم شہباز شریف سے ملاقات متوقع ہے۔ وزیراعظم شہباز شریف بلاول زرداری کے اعزاز میں عشائیہ دیں گے۔ بلاول زرداری ملاقات میں تحریری معاہدے پرعملدرآمد میں تاخیر کا معاملہ وزیراعظم کے سامنے اٹھائیں گے۔ اور پنجاب کے پارٹی رہنماؤں کے تحفظات سے وزیراعظم کو آگاہ کریں گے۔
