راولپنڈی،9 مئی واقعے کے وعدہ معاف گواہ منحرف
انسداد دہشت گردی عدالت راولپنڈی میں 9 مئی واقعے کے وعدہ معاف گواہ منحرف ہوگئے۔
سابق ڈپٹی اسپیکر پنجاب اسمبلی واثق قیوم عباسی اور عمر تنویر بٹ نے انسداد دہشت گردی عدالت میں 164 کے بیان سے متعلق درخواست دائر کر دی۔
درخواست میں کہا گیا کہ ہم نے عمران خان کے خلاف وعدہ معاف گواہ بن کر کوئی ایسا بیان کسی مجسٹریٹ کے سامنے یا تحریری طور پر نہیں دیا، ہمیں عمران خان نے ہمیشہ ہمیں پرامن جدوجہد کا درس دیا، عمران خان کے خلاف سنگین نوعیت کے الزامات سے متعلق ہمارے بیانات کی کوئی حقیقت نہیں۔
واثق قیوم اور عمر تنویر بٹ کی جانب سے محمد ایڈووکیٹ فیصل ملک نے درخواست دائر کی، انسداد دہشت گردی کی خصوصی عدالت نے درخواست کو ریکارڈ کا حصہ بنا لیا۔
اے ٹی سی راولپنڈی کے جج ملک اعجاز آصف درخواست پر آج ہی اڈیالہ جیل میں سماعت کریں گے۔
انسداد دہشت گردی عدالت راولپنڈی کے جج ملک اعجاز اصف اڈیالہ جیل پہنچ گئے جبکہ چیئرمین پی ٹی آئی بیرسٹر گوہر، سینیٹر اعظم خان سواتی بھی اڈیالہ جیل پہنچ گئے جبکہ ملزمان کے متعدد وکلا بھی اڈیالہ جیل پہنچنا شروع ہو گئے۔
