عبدالرحمان واصف ناں پوٹھوہاری شعری مجموعہ ہُسَّڑ
عبدالرحمان واصف ہوراں ناں تعلق کہوٹہ نال آ۔۔ اردو نیں نال نال ماء بولی نیں وی صاحب اسلوب شاعر اے۔ ہن توڑی انھاں نیں اردو نیں ترے (تین) شعری مجموعے چھاپے چڑھی تے داد حاصل کری چکے۔۔ تے پوٹھوہاری ٹہائی مصرعیاں نظماں "چریٹھ” اہل سخن نی داد تے تعریف نی مستحق ٹھہری۔
واصف عام راہ کولا ہٹی تے ٹرنے والا لخاری آ۔ اوہ اپنے دوئے شعری مجموعے "تحیر” نے چھپنے نال بہوں مشہور ہوئی گا سا۔ انھاں واستے بہوں سوخا کم سا جے اسے معیار نیاں سٹھ ستر غزلاں لخی تے چھے مہینیاں نے اندر اندر ہک ہور شعری مجموعہ چھاپے چاڑھی شوڑن آ ۔ پر انھاں ہک اوخی راہ چنی تے نکیاں ترین بحراں وچ ہک مکمل شعری مجموعہ "مختصر” نے نائیں نال چھاپی تے ادب وچ اپنے نویکلے پن ناں پکا ثبوت پیش کیتا نیں۔ ہوناں تے یوء چائیناں سا جے علمی ادبی لوک انھاں نے اس نویکلے کم نی قدر کرن آ، تے ادارے وی اپنا کردار ادا کرن آ ، پر مادیت نے آستانے اپر متھا رغڑنے والے لوکاں نی ترجیح معیاری نہیں مقبول ادب آ۔ حریانی نی گل یاء ای جے پذیرائی نہ لبھنے نے باوجود واصف ہوراں ہمت نئی ہاری تے نانہہ یے اوہ ہتھے اپر ہتھ رکھی بئی رہے بلکن انھاں نکیاں ترین نظماں نی ہک نویں صنف متعارف کروائی شوڑی جس وچ کل سوا دو مصرعے اے ۔ تے مہاڑے جئے ماء بولیاں نے خذمت گار واستے یاء ہور وی خشی نی گل ای جے ایہہ نظماں واصف نی اپنی ماں بولی پوٹھوہاری وچ یاں۔ نظماں عروضی اعتبار نال لوہکیاں ضرور یاں پر انھاں وچ خیال بہوں بڑے تے آفاقی پیش کیتے گئے۔
بندیاں ناں ایہہ درد یرو کد تک
خشبو، پھل ، کونجاں ، مور لخو
کج ہور لخو
کنڈے پوڑنے عشقے نی راہ اوکھی
توں جے راہ ایہہ لپڑی ، دل گیر ہوسیں
لیر و لیر ہوسیں
ہک دوئے نال پھسائی سنگ تے کیہ لبھسی
آ، رلی ملی تے سارے مسلے حل کریے
ہُنڑ گل کریے
چپ رہسیں آخر کد تک توں
بنڑواسیں روز مخول یرا
کج بول یرا
عبدالرحمان واصف ہوراں ناں نویں پوٹھوہاری شعری مجموعے "ہسڑ” وچ زیادے تعداد غزلاں نی ای۔ تے غزل وی واصف جیئے پوٹھوہاری نیں "صاحب اسلوب” شاعر نی جس ناں جادو سر چڑھی تے بولنا آ۔ کج شعر دکھو تے آپو دسو جے ایہے جیئے شعر تساں پہلیاں کدھرے پڑھے۔۔۔۔۔
چَنگا ہوئیں آ تے کَھنڈا نانہہ ہوئیں آ
پُورے پَہھانڈے طعنہ دِتّا کَھنڈے کی
چَہھاتیاں مار نہ لوکاں دَر
تَکھ اپنا گلماݨ یَرا
ڈاہڈی اَگ پَہھڑکائی اے
سُتھرے اَکَھر جوڑے نی
دُنیا وچ کردار آ بس ایہ بَندیاں نا
جِسرے پانیے اندر سِکلے تَرنے پے
سچ سُناݨے نے شونقی اے یاد رکھݨ
سچ آخی جُثّے پُر چمڑی نِینہ رہݨی
میں کس آسطیں شوہدی دُنیا کی رَکھاں
ایہ سُوہݨی تے تھئی، اتنی سوہݨی وی کوئی نِینہ
سَچے نِینہ، فر وی
خاب تہھروکاں میں
اُس وی چَنگا گَجّی بَجّی گَل کِیتی
دل تے میں وی اپنا بَٹّا کِیتا وا
اَج تُوں جُلیائیں چھوڑی تے
اَج مِلساں اَس کَہاٹے نال
ہُݨ پِھرنی پَئی جُثّے اندر خالی کُوک
سَدراں، ہُملاں، رنگ، تماشے رُہڑی گئے
پوٹھوہاری، پہاڑی، گوجری تے ہندکو نیں لکھاری تے قاری یوء شعری مجموعہ ضرور پڑھن۔ مہنغپائی نیں اس طوفان وچ کتاب نی چھپائی بہوں مہنغی ہوئی گی اس واستے کتاباں محدود تعداد وچ چھپنیاں۔ اپنی کاپی اج یے بک کرواؤ، ان شاءاللہ کتاب مئی وچ یے تساں تک پوہچی گیسی۔۔۔۔۔
ندیم صدیقی
03005211201
آواز پبلی کیشن ، کمیٹی چوک ، راولپنڈی
۔۔۔۔۔۔۔۔۔۔۔۔۔۔۔۔۔۔۔
راشد عباسی ، راول پنڈی