وزیراعظم آزادکشمیر چوہدری انوارالحق نے ہدایت کی ہے کہ دومیشی لینڈ سلائیڈنگ کے متاثرین کو 72گھنٹوں میں متبادل زمین الاٹ کر کے زمین کے کاغذات ان کے حوالے کیے جائیں، دولائی لینڈ سلائیڈنگ والی جگہ کو جلد ازجلد ہیوی ٹریفک کیلئے کھولا جائے، این ایچ اے دولائی سلائیڈنگ کی بحالی کیلئے اضافی مشینری اور عملہ بھیجے، کوتاہی کسی صورت برادشت نہیں کی جائیگی،
وزیر اعظم نے برہمی کا اظہار کرتے ہوئے کہا کہ دولائی لینڈ سلائیڈنگ کی بحالی کیلئے این ایچ اے نے سنجیدگی کا مظاہرہ نہیں کیا۔ مظفرآباد آنے والے سیاحوں کی موثر رہنمائی کی جائے جب تک دولائی لینڈ سلائیڈنگ ٹھیک نہیں ہوتی سیاحوں کو کسی صورت اس راستے سفر نہ کرنے دیا جائے تاکہ کسی بھی پریشانی سے بچا جا سکے انہیں دشواری کا سامنا نہ کرنا پڑے۔
ان خیالات کا اظہار انہوں نے دومیشی لینڈ سلائیڈنگ کے متاثرین کی بحالی اور دولائی مین شاہراہ پر لینڈسلائیڈنگ بارے اعلیٰ سطح کے اجلاس میں متعلقہ حکام کو ہدایات دیتے ہوئے کیا۔ اجلاس میں سینئر موسٹ وزیر کرنل ریٹائرڈ وقار احمد نور، وزیر حکومت چوہدری محمد رشید، چیف سیکرٹری ڈاکٹر محمد عثمان چاچڑ، پرنسپل سیکرٹری فیاض علی عباسی،سیکرٹری مالیات عصمت اللہ شاہ، سیکرٹری سروسز و مواصلات ظفر محمود خان، سیکرٹری ایس ڈی ایم اے ڈاکٹر لیاقت، کمشنر مظفرآباد عدنان خورشید، ڈی آئی جی پولیس عرفان مسعود کشفی، ڈپٹی کمشنر طاہر ممتاز اور نیشنل ہائی وے اتھارٹیز کے حکام نے شرکت کی۔
