کوہسار وچ انجیر نی شجر کاری تے پیوند کاری

یقینا تساں نے علم وچ ہوسی کہ پاکستان وچ انجیر ناں استعمال اٹھائی ہزار من نیں قریب سالانہ آ تے اساں تقریبا دس ہزار من سالانہ سکی انجیر ترکی، ایران تے افغانستان سی درآمد کرنیں آں۔

کہسار نیں علاقے وچ پھغواڑی نیں بوٹے عام نظری اشنے۔ کدے انھاں بوٹیاں اپر قلماں لائیاں گچھن تے ایہہ بوٹے لکھاں ڈالر ناں زر مبادلہ بچانے ناں ذریعہ بنی سکنے۔ کدے قلماں نانہہ وی لائیاں گچھن تے انجیر ناں بوٹا نرسریاں وچا وی پنجا سٹھ روپے ناں لبھی رہناں۔ تے دو ترے سالاں وچ بڑا بوٹا بنی گشناں۔ کدے ساڑھے علاقے وچ انجیر نے صرف ہک ہزار بوٹے ہون، تے ہر بوٹے اپر پنج کلو انجیر وی لگے تے پنج ہزار کلو انجیر حاصل ہوئی کنی۔

سکی انجیر بزارے وچ بہوں مہنغی بکنی پر تازی انجیر وی کوئی سستی نئی۔ ضروری آ جے زراعت ناں محکمہ لوکاں کی انجیر نی بہترین شجر کاری، بوٹیاں نی دکھ پہال تے انجیر کی سکانے تے پیک کرنے نے حوالے نال ضروری رہنمائی فراہم کرے۔

صحافت نال وابستہ سنگیاں، سماجی خذمت نیاں تنظیماں تے پڑھے لخے احباب نی خذمت وچ درخاس ای جے اوہ اس موضوع اپر تسلسل نال لخن تاں جے مقامی روزگار ناں ہک ہور موقع لوکاں نی نظر وچ اچھے۔
۔۔۔۔

راشد عباسی