شہباز شریف کی قیادت میں پی ڈی ایم کی اتحادی جماعتوں نے ملکی پارلیمانی تاریخ میں تیز ترین قانون سازی کا ریکارڈ قائم کرلیا،اپوزیشن کے شور شرابے اور ہنگامے کے باوجود صرف چار روز میں 54 بل منظور کرا لیے گئے۔
جو بل منظور کرائے گئے ان میں سے 35 نجی یونیورسٹیوں کے قیام سے متعلق ہیں۔ اختلاف کے باوجود ضمنی ایجنڈے کے تحت بدھ کو مزید 7 بل قومی اسمبلی سے منظور کرائے گئے ۔
قومی اسمبلی کا اجلاس اسپیکر راجہ پرویز اشرف کی زیر صدارت ہوا۔ اس دوران گیس چوری کی روک تھام اور وصولی کا ترمیمی بل ،زکوٰۃ و عشر ترمیمی بل ، ایپوسٹائل ترمیمی بل،غیر ملکی عوامی دستاویزات کے لیے قانونی حیثیت کی شرط ختم کرنے سے متعلق بل،پاکستان میڈیا ریگولیٹری اتھارٹی ترمیمی بل 2023 بھی اضافی ترامیم کے ساتھ منظور کیا گیا ۔
دریں اثنا چیئرمین صادق سنجرانی کی زیر صدارت سینیٹ کے اجلاس میں پاکستان سول ایوی ایشن بل اور پاکستان ایئر سیفٹی انویسٹی گیشن بل 2023ء بھی ایوان نے متفقہ طور پر منظور کرلیا۔
