اساں کوہ مری جلنے اسیاں۔ راہ وچ بوژے (بندر) دکھی تے نکیاں ضد کری تے گڈی روکائی شوڑی۔۔ باہر لکڑی تے اوہ کھانے نیاں چیزاں بندراں کی سٹن لگی پئے۔ میں دکھی تے بہوں حریان وہا یاں کہ جہڑی چیز بچے سٹن ہک بدمعاش بوژا اس اپر قبضہ کری کہنے۔ ہک کیلا سڑکے نیں کول پیا وہا سا۔ ہک ماہتڑ جیہا بوژا اس کی چانے واستے آیا تے بدمعاش بوژے نی اوہ چنڈ پئی ایس کہ چار فٹ بہن (تھلے) گچھی لگا۔ میکی یقین ہوئی گا جے ماہتڑاں ناں حق مارنا تے انھاں اپر ظلم کرنا تغڑیاں نی نفسیات وچ شامل آ۔ جانور ہون کیں انسان ۔۔ ماہتڑاں نال تغڑے ایہے سلوک کرنے بلکن جانور سارے نیئے کرنے ایہہ جیہڑے بندر اے ایہہ قرآن آخنا جے پہلیاں انسان سے تے فر انھاں نے کرتوتاں نی وجہ نال انھاں کی آخیا گا ایسا۔۔
كُوْنُوْا قِرَدَةً خٰسِـٕیْنَۚ(البقرہ ۶۵)
دوئے پاسے سائنس اپر انہھاں (اندھا) ایمان رکھنے والے آخنے جے اس سارے بندر نی اولاد یاں۔ تے یاء گل سارے آں تھی پہلیاں ڈارون ہوراں کی خورے اپنے کیہڑے چتے (شرارت) نی وجہ نال پتہ لگی سی۔ تے انھاں سارے لوکاں کی ڈنڈ بائی جے انھاں نے لکڑ دادے ہوراں نے لکڑ دادا بندر ایسے۔ فر انھاں بادھا کیتا۔ چاں (چار) نے بجائے داں (دو) جنگاں نال ٹرناں سکھیا نیں۔ فر انھاں کی بولنا چالناں وی اچھی گا۔ اوہ باشعور وی ہوئی گئے۔ تے اسرے موجودہ انسانی نسل اتھیں پوہچی۔ خورے جہڑے ہن توڑی بندر اے اوہ کیاں نیہے بادھا کری سکے؟؟؟؟؟ تے ارتقاء ناں تقاضا جے اوہ آگیں سی اگیں بدھناں۔ تے خورے انساں اڈرناں (اڑنا) کیاں نآء شروع کیتا؟؟
گل ہونی سی ظلم تے حق مارنے نی۔ کشمیر نے مسئلے کی دکھی کہنو۔ مسئلا کشمیریاں ناں تے فیصلے کرنیاں کشمیریاں کی کوئی پچھناں یے نآء۔ ہندوستان ویہہ کیں پاکستان یا سامراج۔۔۔۔ ساریاں کی کشمیر چائیناں۔۔۔۔ کشمیری کسے کی وی نیہے پجنے۔ انصاف نی گل یاء سی جی یوء کشمیر تھیا تے کشمیریاں ناں آ۔۔ تے انصاف ناں تقاضا یوء آ جے انھاں کی اپنی مرضی نال اس نے مستقبل نے بارے وچ فیصلہ کرنے نی آزادی دتی گچھے۔
کوڑی حقیقت یاء ای جے منظم سامراج اپنی طاقت (کارپوریٹوکریسی) نیں ذریعے ماہتڑ ملکاں نیں وسائل اپر غاصبانہ قبضہ کری بیٹھا وہاء۔ پاکستان جیہے ملخاں وچ قدرتی وسائل نی بہتات نیں باوجود اتھیں نیں لوک ڈنگراں سی وی ماڑی زندگی گزارنے اپر مجبور اے۔ جدید دور ناں سامراج ملخاں اپر قبضہ کرنے نے بجائے اتھیں نیں لمبڑداراں (میر جعفراں) ناں ضمیر تے ایمان خریدی تے انھاں کی اپنی کٹھ پتلی نیں طور اپر اپنے مفادات نیں تحفظ واستے استعمال کرنا۔
سامراج مقامی بااثر لوکاں، تنظیماں تے این جی اوز نیں ذریعے تے میر جعفراں نی مدد نال مقامی لوکاں کی اپنی ثقافت، زبان تے پچھان نیں حوالے نال احساس کمتری وچ باہناں (مبتلا کرنا). بڑے منظم طریقے نال لوکاں نی ذہن سازی کیتی گشنی تے یاء غلط فہمی عام کیتی گشنی جے لوک رہتل، ماء بولی تے تہذیبی ورثہ بادھے (ترقی) نی راہ وچ رکاوٹ اے۔ مقصد یوء ہونا جے مقامی لوک اپنی پچھان نے حوالے نال احساس کمتری ناں شکار ہوئی گھچن تاں جے تخلیقی ذہن تے انقلابی کردار پیدا نہ ہون۔
اساں کدے غور و فکر کریے تے اج اساں تعلیم ناں مقصد صرف نوکری بنائی کہندا۔ اساں کدے ہک تراڑ (پتھر) چائیے تے ہٹھا (نیچے سے) پندراں نوکر لکڑی اشنیں۔ تے اسے واستے حرص، لالچ تے مہاڑی تہاڑی اساں کی ٹرنے پھرنے پچھاوے بنائی شوڑیا۔ اٹھاراں سو ستاون سی بعد اساں کیہڑا باز خان پیدا کیتا؟ علامہ مضطر عباسی نے علم و فضل سی اساں کیہڑا فایدہ چایا؟ کریم اللہ قریشی، پروفیسر اشفاق کلیم عباسی، ڈاکٹر محمد صغیر جیہیاں نابغہ روزگار شخصیتاں اج خش قسمتی نال ساہڑے وچ موجود یاں۔ انھاں نے مقابلے وچ کوٹھیاں، کاراں، ہوٹلاں آلیاں نی کیہہ حیثیت ای؟ پر جینیاں جینیاں کسی ناں بڑیت (عظمت) مننے ناں ساہڑے ہاں رواج ہے ناء۔
اساں کدے حقیقی آزادی حاصل کری کہنیے۔ کنٹرولڈ ڈیموکریسی ناں خاتمہ ہوئی گچھے۔ اسٹبلشمنٹ نیں خلاف عوامی طاقت میدان وچ اچھی گچھے۔ قدرتی وسائل نیں استعمال نی راہ وچ سامراج نی کٹھ پتلی نے طور اپر اسٹبلشمنٹ حائل نہ ویہہ۔۔ آئی ایم ایف نیں بجائے اساں کی اپنی قومی ضرورتاں ای ساہمنے رکھی تے معاشی ترجیحات بنانے نی آزادی ویہہ۔۔۔۔ تے پاکستان دنیا نے امیر ترین ملخاں نی فہرست وچ شامل ہونے نی پوری اہلیت رکھنا۔ پر بدقسمتی نال میر جعفر پاکستان نے بجائے آئی ایم ایف نیں وفادار اے۔ جنھاں اساں کی قرضیاں نیں جال وچ پھسائی تے حقیقی آزادی سی محروم کری شوڑیا نیں۔
ساہڑے پڑھے لخے لوکاں ناں فرض آ جے سیاسی نعرے بازی نیں بجائے اپنے مقام و مرتبے کی ساہمنے رکھی تے کوئی وقیع فکری تے علمی کم کرن۔ نوجواناں کی نظام، اس نیں کم کرنے نے طریقے تے اس کی بدلانے نیں طریقہ کار نیں حوالے نال رہنمائی فراہم کرنا اہل علم و فضل ناں فرض آ۔۔ یوء ملک ساہڑا کہر (گھر) آ۔۔ کہرے کی سانوناں، سجاناں تے اس نی حفاظت کرنا اساں ساریاں نی ذمہ داری ای۔
___________
