اسلام آباد میں امریکی شہریوں کیلئے حیران کن الرٹ کیوں جاری ہوا؟

امریکہ کی جانب سے اسلام آباد میں مقیم اپنے شہریوں کے لیے الرٹ جاری کرنے کے انداز پر حیرت کا اظہار کیا جا رہا ہے ۔ واضح رہے کہ کسی بھی ملک کے کسی بھی شہر میں اپنے سفارتی ارکان کو محتاط رہنے کے حوالے سے الرٹ جاری کرنا معمول کاعمل ہے تاہم امریکی حکومت کی جانب سے اسلام آباد میں مقیم اپنے سفارتی عملے کو گزشتہ روز جو الرٹ جاری کیا گیا ہے اس میں خاص طور پر میریٹ ہوٹل سے دور رہنے کی ہدایت جاری کی گئی ہے اور کہا گیا ہے کہ یہاں امریکی شہریوں کو نشانہ بنایا جا سکتا ہے۔
امریکی حکومت کی جانب سے جاری الرٹ میں کہا گیا ہے کہ میریٹ ہوٹل اسلام آباد میں تعطیلات کے دوران امریکیوں کو نشانہ بنانے کی منصوبہ بندی کی گئی ہے۔
الرٹ میں مزید کہا گیا ہے کہ سیکیورٹی خدشات کی بنا پر اسلام آباد کو ریڈ الرٹ پر رکھا گیا ہے لہذا امریکی شہری غیر ضروری نقل و حرکت سے گریز کریں۔ مثال کے طور پر عوامی مقامات پر نہ جائیں۔ عبادت گاہوں میں جاتے وقت صورتحال پر کڑی نظر رکھیں ۔اپنے ذاتی سکیورٹی پلان پر توجہ دیں۔
اپنی شناخت ظاہر رکھنے کے علاوہ قانون نافذ کرنے والے اداروں کی ہدایات پر عمل کریں۔ اپنے ارد گرد کے حالات پر نظر رکھیں۔ مقامی میڈیا کی اپ ڈیٹس کو مانیٹر کرتے رہیں۔