ایبٹ آباد کے علاقے بکوٹ سے تعلق رکھنے والے قومی احتساب بیورو کے افسر عدنان حفیظ عباسی نے بہترین تفتیشی افسر کا ایوارڈ حاصل کر لیا۔
عدنان حفیظ عباسی نیب کراچی میں ڈپٹی ڈائریکٹر کے فرائض انجام دے رہے ہیں، اور انہوں نے مختصر مدت میں محنتی اور فرض شناس آفیسر کی شہرت حاصل کرلی ہے۔ یہ امر قابل ذکر ہے کہ سرکل بکوٹ ہی کے علاقے بیروٹ سے تعلق رکھنے والے بریگیڈیئر ریٹائرڈ مصدق عباسی قبل ازیں نیب میں اہم عہدوں پر فائز رہے ہیں، وہ ڈائریکٹر ریسرچ اینڈ انالیسز کی حیثیت سے کراچی میں خدمات انجام دیتے رہے ہیں۔ بعد ازاں وہ بلوچستان اور خیبرپختونخوا میں ڈی جی نیب کے عہدے پر فائز رہنے کے بعد اسلام آباد میں ڈائریکٹر جنرل نیب کےفرائض انجام دیتے رہے ۔
کچھ عرصہ قبل بریگیڈیئر مصدق عباسی کو شہزاد اکبر کی جگہ وزیر اعظم کا مشیر برائے احتساب مقرر کیا گیا تھا تاہم عمران خان کی حکومت کے خاتمے کے ساتھ کابینہ بھی ختم ہوگئی تھی۔ پنجاب میں پرویز الہی کی حکومت بننے کے بعد انہیں وزیراعلی کا معاون خصوصی برائے اینٹی کرپشن مقرر کیا گیا ہے۔ بریگیڈیئر مصدق عباسی کے بعد عدنان حفیظ عباسی نیب کے وہ دوسرے افسر ہیں جن کا تعلق سرکل بکوٹ سے ہے۔وہ بکوٹ کی نامور شخصیت سردار حفیظ الرحمان عباسی ایڈوکیٹ کے فرزند ہیں ۔ نیب میں بہترین تفتیشی افسر کی حیثیت سے خدمات انجام دینے پر چیئرمین آفتاب سلطان کے دستخطوں سے انھیں ایوارڈ سے نوازا گیا ہے۔
