سموگ کی شدت،لاہور کے اسکول ہفتے میں تین روز بند

پنجاب میں اسموگ کی شدت نے تعلیمی اداروں کو بھی اپنی لپیٹ میں لے لیا ہے اور لاہور میں اسکولوں کی ہفتہ وار تین تعطیلات کا اعلان کردیا گیا ہے ۔لاہور ہائی کورٹ کے حکم پر ہفتے میں تین چھٹیوں کا نوٹیفکیشن بھی جاری کردیا گیا ہے۔
چھٹیوں کا اطلاق لاہور ضلع کے تمام سرکاری اور پرائیویٹ اسکولوں پر ہوگا۔ علاوہ ازیں لاہور میں آج سے تمام اسکولوں کے طلباء و طالبات کے لئے ماسک لازمی قرار دیا گیا ہے۔
یہ امر قابل ذکر ہے کہ شدید سموگ کی وجہ سے لاہور کا شمار دنیا کے آلودہ ترین شہروں میں ہونے لگا ہے جہاں ماحولیاتی ایمرجنسی نافذ کی گئی ہے۔ آلودہ شہروں میں لاہور مسلسل پہلے نمبر پر ہے جس کی وجہ سے نزلہ زکام بخار اور سانس کی بیماریاں تیزی سے پھیل رہی ہیں ۔
لاہور اور بعض دیگر شہروں میں ماحولیاتی ایمرجنسی کے نفاذ کا اعلان گزشتہ روز وزیر اعلیٰ پنجاب چوہدری پرویز الٰہی نے کیا تھا۔