سابق صدر اور پیپلز پارٹی کے شریک چیئرمیں آصف علی زرداری منگل کی شام وزیراعظم شہباز شریف سے ملاقات کیلئے اچانک وزیراعظم ہاؤس پہنچے۔
وزیراعظم شہباز شریف نےان کا استقبال کیا۔ حکومتی ذرائع کے مطابق سابق صدر نے وزیراعظم کی مزاج پرسی کی جو حال ہی میں کرونا میں مبتلا ہو گئے تھے جس پر شہباز شریف نے سابق صدر کی آمد پر ان کا شکریہ بھی ادا کیا۔
ملاقات میں شہبازشریف اورآصف علی زرداری نے ملکی سیاسی اور معاشی صورتحال پر بھی تبادلہ خیال کیا۔ اگرچہ اس ملاقات کے اصل مقصد کے حوالے سے کوئی تفصیل جاری نہیں کی گئی تاہم آرمی چیف کے تقرر کے تناظر میں ملاقات کو اہم قرار دیا جارہا ہے، یہ امر قابل ذکر ہے کہ اس ملاقات کے چند گھنٹے بعد آرمی چیف سے متعلق سمری بھی وزیر اعظم ہاؤس کو بھجوائے جانے کی خبر سامنے آئی اور اس طرح اس اہم اور حساس ترین عہدے پر تقرری کے حوالے سے کئی روز سے جاری ابہام دور ہو گیا۔
