وزیراعظم آزاد کشمیر وصدر پاکستان تحریک انصاف سردار تنویر الیاس خان نے کہا ہے کہ بلدیاتی انتخابات کےلیے پاکستان تحریک انصاف آزاد کشمیر کے امیدواروں کو ٹکٹ جاری کردیے گئے ہیں،تمام ٹکٹ ہولڈرز کو مبارکباد پیش کرتا ہوں، آزادکشمیر میں 31 سال کے بعد بلدیاتی انتخابات کا انعقاد ہورہا ہے اور یہ کریڈٹ تحریک انصاف کی حکومت کو جاتا ہے۔ پی ٹی آئی کے کارکنان انتخابات کیلئے بھرپور تیاری کریں، عوام کارکردگی، میرٹ اور کردار کی بنیاد پر ووٹ دیں تاکہ قابل نمائندے سامنے آسکیں۔گزشتہ 3 دہائیوں میں کئی حکومتیں آئیں لیکن بلدیاتی انتخابات کروانے میں ناکام رہیں۔ اختیارات کی نچلی سطح تک منتقلی کے فیصلے کو عوام نے بھرپور سراہا ہے۔
انہوں نے کہا کہ پی ٹی آئی کے امیدوار اپنی الیکشن مہم بھرپور انداز میں چلائیں لیکن کسی کی دل آزاری کسی صورت نہیں ہونی چاہیئے۔صدر پی ٹی آئی نے کہا کہ ہم نے عام انتخابات کی کمپین میں اقتدار نچلی سطح پر منتقل کرنے کا جو وعدہ کیا تھا وہ وعدہ پورا ہورہا ہے اور انشاءاللہ چئیرمین تحریک انصاف عمران خان کے وژن کے عین مطابق اقتدار نچلی سطح پر منتقل ہورہا ہے ۔ ٹکٹس کی تقسیم میرٹ پر کی گئی ہے اور میں تمام ٹکٹ ہولڈرز کو کہتا ہوں اپنی کمپین تحریک انصاف کے وژن کے مطابق بھرپور طریقے سے کریں لیکن اس کے ساتھ رواداری ,بھائی چارے اور باہمی عزت و احترام کو ملحوظِ خاطر رکھیں ہر ممکن کوشش کریں کہ پرامن اور دوستانہ ماحول میں بلدیاتی انتخابات منعقد ہوں, 31 سال بعد آزادکشمیر کی عوام کی محرومیاں کا ازالہ ہورہا ہے 27 نومبر کو پی ٹی آئی کو بھرپور طریقے سے کامیاب کروائیں تاکہ اقتدار کی نچلی سطح پر منتقلی کے ساتھ ساتھ ترقی اور آزادکشمیر کو بدلنے کا جو سفر ہم نے شروع کیا ہے وہ مذید تیزی سے جاری رہے۔وزیراعظم آزاد کشمیر سردار تنویر الیاس نے کہا کہ تیز رفتار ترقی، عوام کو خوشحال بنانے اور انکے مسائل مقامی سطح پر حل کرنے کیلئے اقتدار کو نچلی سطح پر منتقل کرررہے ہیں۔عام انتخابات کی طرح بلدیاتی انتخابات میں بھی بھرپور کامیابی حاصل کرین گے
