تیجس لڑاکا طیاروں کا مکمل فلیٹ گراؤنڈ کردیا

رپورٹس کے مطابق 7 فروری کو پیش آنے والے ایک واقعے کے بعد زیرِ استعمال تمام 35 تیجس طیاروں کی پروازیں روک دی گئی ہیں اور ان کی مکمل فنی جانچ کا عمل شروع کر دیا گیا ہے۔

ذرائع کا کہنا ہے کہ یہ فیصلہ اس وقت کیا گیا جب ایک سنگل نشست والا تیجس طیارہ مغربی محاذ پر واقع ایک اگلے اڈے سے اڑان بھرتے وقت رن وے سے پھسل کر قریب موجود کیچڑ سے بھرے گڑھے میں جا گرا۔ حادثے کے وقت طیارہ 170 کلومیٹر فی گھنٹہ سے زائد رفتار حاصل کر رہا تھا۔ واقعے میں پائلٹ زخمی ہوا تاہم اسے فوری طبی امداد فراہم کی گئی۔

بھارتی ذرائع ابلاغ کے مطابق حادثے کی اصل وجہ تاحال معلوم نہیں ہو سکی، جس کے باعث احتیاطی اقدام کے طور پر پورے بیڑے کی تفصیلی جانچ کا حکم دیا گیا ہے۔

تیجس طیارہ 2016 میں بھارتی فضائیہ میں شامل کیا گیا تھا۔ یہ حالیہ واقعہ اس پروگرام کو پیش آنے والا تیسرا بڑا نقصان قرار دیا جا رہا ہے۔ اس سے قبل مارچ 2024 میں راجستھان کے جیسلمیر میں تربیتی پرواز کے دوران ایک طیارہ گر کر تباہ ہوا تھا، جبکہ نومبر 2025 میں دبئی میں ہونے والی فضائی نمائش کے دوران پیش آنے والے حادثے میں ایک ونگ کمانڈر ہلاک ہوگیا تھا۔

حکام کا کہنا ہے کہ تحقیقات مکمل ہونے کے بعد طیاروں کی پروازوں سے متعلق حتمی فیصلہ کیا جائے گا۔