بنوں،فورسز کے قافلے پرحملہ ناکام،5دہشتگرد ہلاک،2اہلکارشہید

پاک فوج کے شعبہ تعلقات عامہ آئی ایس پی آر کی جانب سے جاری بیان کے مطابق 21 فروری کو انٹیلی جنس بنیاد پر کیے گئے آپریشن کے دوران فورسز کے قافلے کو شدت پسند عناصر کی جانب سے نشانہ بنانے کی کوشش کی گئی۔ کارروائی علاقے میں خودکش حملہ آور سمیت مسلح افراد کی موجودگی کی اطلاع پر کی گئی تھی۔

بیان میں کہا گیا کہ بارودی مواد سے بھری گاڑی پر سوار خودکش بمبار کو اگلے دستے نے بروقت روک لیا، جس سے ممکنہ بڑا نقصان ٹل گیا۔ حکام کے مطابق حملے کا مقصد بنوں شہر میں شہریوں اور قانون نافذ کرنے والے اداروں کو نشانہ بنانا تھا۔

فورسز نے علاقے میں ٹھکانوں کا سراغ لگا کر فائرنگ کے تبادلے میں پانچ دہشت گردوں کو ہلاک کر دیا۔ تاہم شدت پسندوں کی جانب سے بارودی گاڑی ایک سیکیورٹی گاڑی سے ٹکرا دی گئی، جس کے نتیجے میں لیفٹیننٹ کرنل شہزادہ گل فراز اور سپاہی کرامت شاہ شہید ہوگئے۔

آئی ایس پی آر کے مطابق لیفٹیننٹ کرنل شہزادہ گل فراز اپنی پیشہ ورانہ مہارت اور جرات مندانہ قیادت کے باعث جانے جاتے تھے اور اگلے مورچوں سے دستوں کی قیادت کر رہے تھے۔

بیان میں مزید کہا گیا کہ سیکیورٹی فورسز ملک سے دہشت گردی کے خاتمے کے لیے کارروائیاں جاری رکھیں گی اور اہلکاروں کی قربانیاں قومی عزم کو مزید مضبوط بناتی ہیں۔