آصف علی زرداری کی عمران خان پر تنقید

آصف علی زرداری نے کہا کہ ابھی ڈیڑھ سال ہی ہوا ہے، جیل حوصلے سے کاٹنی چاہیے۔ انہوں نے اپنی بہن کی گرفتاری کا حوالہ دیتے ہوئے کہا کہ جب انہیں رات کے وقت پکڑا گیا تو اس وقت کسی کو یاد نہیں آیا۔ انہوں نے یہ بھی کہا کہ بینظیر بھٹو نے 24 سال کی عمر میں قید کاٹی اور پانچ سال سکھر جیل میں رہیں، وہ شہید ذوالفقار علی بھٹو کی بیٹی تھیں اور بہادری سے مشکلات کا سامنا کیا۔

صدر مملکت کا کہنا تھا کہ پاکستان کی سیاسی اونرشپ پاکستان پیپلز پارٹی کے پاس ہے اور مختلف “کپتان” آتے جاتے رہتے ہیں، انہیں سنبھالنا پارٹی جانتی ہے۔

انہوں نے ناراض بلوچوں کو مذاکرات کی دعوت دیتے ہوئے کہا کہ اب بندوق نہیں بلکہ بات چیت کا زمانہ ہے اور مسائل کا حل مذاکرات سے نکالا جانا چاہیے۔

آصف علی زرداری نے اعلان کیا کہ پنجاب کے کچے کے علاقے میں سندھ حکومت یونیورسٹی قائم کرے گی جبکہ وہ خود بھی اس علاقے میں میڈیکل یونیورسٹی کے قیام کے خواہاں ہیں۔ انہوں نے کہا کہ یونیورسٹی کے قیام کی منظوری صدر دیتا ہے اور وہ اس کی اجازت ضرور دیں گے۔