علامہ راجہ ناصر عباس جعفری کی طبیعت ناساز ہو گئی

ترجمان کے مطابق ایم ڈبلیو ایم کا ایک وفد پارلیمنٹ ہاؤس کھانا پہنچانے کے لیے پہنچا، تاہم پارلیمنٹرینز تک کھانا پہنچانے کی اجازت نہیں دی جا رہی۔ ان کا کہنا تھا کہ خواتین اراکین بھی عمارت کے اندر موجود ہیں، جس سے صورتحال پر مزید تشویش بڑھ گئی ہے۔ انہوں نے کہا کہ وفد پارلیمنٹ ہاؤس کے دروازے پر موجود ہے لیکن داخلے کی اجازت نہیں دی جا رہی۔

ادھر ایم ڈبلیو ایم کے وائس چیئرمین علامہ احمد اقبال رضوی نے ملک میں موجود سیاسی صورتحال پر سخت ردعمل دیتے ہوئے کہا کہ ملک میں جبر اور فسطائیت کا ماحول پیدا کیا جا رہا ہے اور عوامی مینڈیٹ کی توہین ہو رہی ہے۔

انہوں نے کہا کہ جس جماعت نے 180 نشستیں حاصل کیں، اس کی قیادت جیل میں ہے، جبکہ کم نشستیں رکھنے والوں کو حکومت دی گئی، جو ان کے بقول ناانصافی کے مترادف ہے۔ ان کا کہنا تھا کہ اس طرز عمل سے پاکستان میں جمہوری نظام کمزور ہو رہا ہے۔

حکام کی جانب سے تاحال اس معاملے پر کوئی باضابطہ مؤقف سامنے نہیں آیا۔