اسلام آباد: حکومت نے پاکستان تحریک انصاف کے بانی چیئرمین عمران خان کو اڈیالہ جیل سے ہسپتال منتقل کرنے کا فیصلہ کر لیا ہے۔ وفاقی وزیر طارق فضل چودھری کے مطابق عمران خان کی صحت کے پیش نظر میڈیکل بورڈ بھی تشکیل دیا جائے گا تاکہ ان کا مکمل طبی معائنہ یقینی بنایا جا سکے۔
وفاقی وزیر نے بتایا کہ عمران خان کو اپنے بیٹوں سے فون پر بات کرنے کی سہولت فراہم کر دی گئی ہے۔ ان کا کہنا تھا کہ حکومت ہر قیدی کو قانون کے مطابق سہولیات فراہم کرنے کی پابند ہے اور انسانی ہمدردی کو مقدم رکھا جا رہا ہے۔
انہوں نے کہا کہ صحت جیسے حساس معاملے پر سیاست نہیں ہونی چاہیے اور سیاسی جماعتوں، خصوصاً پاکستان تحریک انصاف کو بے بنیاد پروپیگنڈے اور سیاسی پوائنٹ اسکورنگ سے گریز کرنا چاہیے۔
وفاقی وزیر کا کہنا تھا کہ حکومت اپنی آئینی و قانونی ذمہ داریاں پوری کر رہی ہے اور اس معاملے پر قومی سنجیدگی اور برداشت کا مظاہرہ کیا جانا چاہیے۔
