امام بارگاہ خودکش حملہ،بمبار کی شناخت سامنے آگئی

ذرائع کا کہنا ہے کہ حملہ آور متعدد بار افغانستان کا سفر کر چکا تھا اور کچھ عرصہ قبل ہی وہاں سے واپس آیا تھا۔ حکومتی ذرائع کے مطابق افغانستان میں سرگرم مختلف دہشت گرد گروہ طالبان رجیم کی سرپرستی میں پورے خطے کی سلامتی کے لیے سنگین خطرہ بن چکے ہیں۔

حکومتی مؤقف کے مطابق پاکستان میں ہونے والی ہر دہشت گردانہ کارروائی کے پس پشت افغانستان اور بھارت کا گٹھ جوڑ شامل ہے۔ ذرائع کا مزید کہنا ہے کہ پوری قوم ان مذموم اور بزدلانہ کارروائیوں کے خلاف سیسہ پلائی دیوار بن کر کھڑی ہے۔

حکومتی ذرائع نے واضح کیا کہ مساجد اور معصوم شہریوں کو نشانہ بنانے جیسے بزدلانہ حملے پاکستانی قوم کے حوصلے اور عزم کو متزلزل نہیں کر سکتے۔

واضح رہے کہ ترلائی کی مسجد میں ہونے والے خودکش دھماکے کے نتیجے میں اب تک 31 افراد شہید جبکہ متعدد نمازی زخمی ہو چکے ہیں، جن کا مختلف اسپتالوں میں علاج جاری ہے۔