ڈیرہ اسماعیل خان،شادی کی تقریب میں خودکش دھماکا،5جاں بحق

ڈیرہ اسماعیل خان میں امن کمیٹی کے سربراہ نور عالم کے گھر منعقدہ شادی کی تقریب کے دوران خودکش دھماکا ہوا، جس کے نتیجے میں 5 افراد جاں بحق جبکہ متعدد زخمی ہو گئے۔ پولیس کے مطابق دھماکا قریشی موڑ کے قریب موسیقی کے پروگرام کے دوران پیش آیا۔

واقعے کی اطلاع ملتے ہی پولیس، ریسکیو 1122 اور بم ڈسپوزل اسکواڈ کی ٹیمیں فوری طور پر جائے وقوعہ پر پہنچ گئیں۔ زخمیوں کو فوری طبی امداد کے لیے قریبی اسپتال منتقل کیا جا رہا ہے، جبکہ بعض زخمیوں کی حالت تشویشناک بتائی جا رہی ہے۔

پولیس حکام کا کہنا ہے کہ دھماکے کی نوعیت اور خودکش حملہ آور سے متعلق شواہد اکٹھے کیے جا رہے ہیں اور واقعے کی مکمل تحقیقات شروع کر دی گئی ہیں۔ علاقے کو گھیرے میں لے کر سکیورٹی سخت کر دی گئی ہے۔