پاکستانی کرکٹرز کے مبینہ کروڑوں کےفراڈ پر وضاحت سامنے آ گئی

کھلاڑیوں کے مطابق متعلقہ کمپنی ان سے مسلسل رابطے میں ہے اور مارچ تک تمام واجبات کی ادائیگی مکمل کرنے کی یقین دہانی کروا چکی ہے۔ ان کا کہنا ہے کہ اب تک صرف دو چیک واپس آئے ہیں، جسے کمپنی نے تکنیکی مسئلہ قرار دیا ہے۔

قومی کرکٹرز نے بتایا کہ اس معاملے پر پاکستان کرکٹ بورڈ کے چیئرمین محسن نقوی نے بھی ان سے رابطہ کیا تھا۔ کھلاڑیوں نے چیئرمین پی سی بی کو صورتحال سے آگاہ کرتے ہوئے بتایا کہ فی الحال کوئی سنگین مسئلہ سامنے نہیں آیا اور اگر مستقبل میں کوئی پیش رفت ہوئی تو فوری اطلاع دی جائے گی۔

کھلاڑیوں کے مطابق کمپنی کے ذمہ واجبات مارچ تک کلیئر کرنے کا وعدہ کیا گیا ہے، جبکہ کمپنی کا مالک دبئی میں مقیم ہے اور مسلسل رابطے میں ہے۔

دوسری جانب ذرائع کا کہنا ہے کہ اب تک کسی بھی کرکٹر کی جانب سے کسی سرکاری یا قانونی فورم پر باقاعدہ شکایت درج نہیں کرائی گئی اور نہ ہی اس معاملے پر پاکستان کرکٹ بورڈ سے رسمی درخواست دی گئی ہے۔

ذرائع کے مطابق بعض کھلاڑیوں نے ایک سابق کپتان کی مثال کو مدنظر رکھتے ہوئے ایک کاروباری شخصیت کے ساتھ سرمایہ کاری کی، جبکہ اس سرمایہ کاری میں موجودہ اور سابق کپتانوں سمیت کئی معروف کرکٹرز کے نام سامنے آئے ہیں۔ اطلاعات کے مطابق کچھ کھلاڑیوں نے غیر معمولی منافع کی امید پر براہِ راست کروڑوں روپے کی سرمایہ کاری کی تھی۔