وفاقی و صوبائی حکومتیں،مذہبی جماعتیں مل کر امن کا حل نکالیں

کراچی پریس کلب میں میٹ دی پریس پروگرام سے خطاب کرتے ہوئے وزیراعلیٰ نے کہا کہ اگر وفاقی حکومت یا وزیراعظم دہشت گردی کے معاملے پر بلاتے ہیں تو وہ سو فیصد شرکت کریں گے۔ ان کا کہنا تھا کہ ملٹری آپریشن مسئلے کا حل نہیں، خیبرپختونخوا میں پہلے ہی 14 آپریشن ہو چکے ہیں اور صوبہ 80 ہزار سے زائد جانوں کی قربانی دے چکا ہے۔

سہیل آفریدی نے کہا کہ جرگے کے ذریعے تمام سیاسی جماعتیں اس نکتے پر متفق ہو چکی ہیں کہ آپریشن نہیں بلکہ مذاکرات اور مشاورت سے آگے بڑھنا ہوگا۔ انہوں نے سوال اٹھایا کہ نئی کارروائی کی کامیابی کی کیا ضمانت ہے، اور کہا کہ ماضی کی قربانیوں کی قدر نہیں کی گئی۔

وزیراعلیٰ کا کہنا تھا کہ پی ٹی آئی ہر قسم کی دہشت گرد تنظیموں کی کھل کر مخالفت کرتی ہے، چاہے وہ ٹی ٹی پی ہو یا کوئی اور گروہ۔ دہشت گردی ہم پر مسلط کی گئی اور اس کے ذمہ داروں کو بھی سامنے لانا چاہیے۔

انہوں نے سندھ اور پنجاب کی سیاست پر بھی بات کرتے ہوئے کہا کہ سندھ میں اب بھی بھٹو خاندان کی سیاست کی جھلک نظر آتی ہے، جبکہ پنجاب میں ماضی کا تجربہ خوشگوار نہیں رہا۔ کراچی میں اتوار کو تاریخی جلسے کا اعلان کرتے ہوئے انہوں نے کہا کہ سندھ حکومت نے زبانی اجازت دی ہے تاہم تاحال تحریری نوٹیفکیشن موصول نہیں ہوا۔

سہیل آفریدی نے کہا کہ خیبرپختونخوا کے معدنی وسائل پر صوبے کے عوام کا حق ہے اور این ایف سی ایوارڈ میں بھی کے پی کو اس کا جائز حصہ نہیں مل رہا۔ انہوں نے الزام عائد کیا کہ 2018 سے اب تک دیگر صوبوں کو وسائل ملتے رہے لیکن خیبرپختونخوا کو نظرانداز کیا گیا۔

بانی پی ٹی آئی عمران خان اور بشریٰ بی بی کی قید پر بات کرتے ہوئے وزیراعلیٰ نے کہا کہ دونوں کو ناحق قید میں رکھا گیا ہے اور سابق وزیراعظم کو طویل عرصے سے ملاقاتوں کی اجازت نہیں دی جا رہی۔ ان کا کہنا تھا کہ پی ٹی آئی کی حکومت سازش کے تحت ختم کی گئی اور موجودہ جدوجہد کسی ایک جماعت نہیں بلکہ عوام کے حقوق کی جنگ ہے۔

انہوں نے کہا کہ ڈائیلاگ ضروری ہیں مگر برابری کی سطح پر ہونے چاہئیں، جبکہ ان کا اپنا کردار اسٹریٹ موومنٹ کو منظم کرنا ہے۔ 8 فروری کے حوالے سے تیاریوں کا اعلان کرتے ہوئے انہوں نے کہا کہ مذاکرات کا اختیار پارٹی قیادت کے پاس ہے اور جہاں بھی عوامی حقوق کی بات ہوگی، پی ٹی آئی ساتھ دے گی۔