شیخ وقاص اکرم کے بھائی پر فائرنگ،گن مین جاں بحق،3 زخمی

پولیس کے مطابق واقعہ سرگودھا روڈ پر پیش آیا، جہاں شیخ فواد اکرم اپنے گن مینوں کے ہمراہ جا رہے تھے۔ پٹرول پمپ کے قریب ان کی گاڑی ملزمان کی گاڑی سے ٹکرا گئی، جس کے بعد دونوں فریقین کے گن مینوں کے درمیان تلخ کلامی اور ہاتھا پائی شروع ہو گئی۔ اسی دوران ملزمان نے فائرنگ کر دی۔

فائرنگ کے نتیجے میں شیخ فواد اکرم کا ایک گن مین موقع پر ہی جاں بحق ہو گیا جبکہ تین دیگر زخمی ہو گئے، جنہیں فوری طور پر قریبی اسپتال منتقل کر دیا گیا۔

ترجمان پولیس کے مطابق فائرنگ کے الزام میں چار ملزمان کو گرفتار کر لیا گیا ہے اور واقعے کی مزید تفتیش جاری ہے۔

ڈی پی او جھنگ بلال افتخار کیانی نے کہا ہے کہ واقعے میں ملوث ذمہ داران کے خلاف سخت قانونی کارروائی عمل میں لائی جا رہی ہے، قانون کو چیلنج کرنے والوں کے ساتھ کوئی رعایت نہیں برتی جائے گی۔ انہوں نے کہا کہ معمولی تنازعے کو تشدد اور فائرنگ میں تبدیل کرنا امنِ عامہ کے لیے سنگین خطرہ ہے۔