عثمان ہادی کے قتل کے خلاف انقلاب منچہ کا شاہ باغ میں دھرنا

بنگلادیشی میڈیا کے مطابق دھرنے کی وجہ سے علاقے میں ٹریفک مکمل طور پر معطل ہے۔ انقلاب منچہ کے ممبر سیکرٹری عبداللہ الجابر نے کہا کہ قاتلوں کو انصاف کے کٹہرے میں لائے جانے تک دھرنا جاری رکھا جائے گا اور ضرورت پڑنے پر رات بھی شاہ باغ میں گزارنے کے لیے تیار ہیں۔

عبداللہ الجابر نے مزید کہا کہ صبح تک ملک بھر سے لوگ احتجاج میں شامل ہوں گے اور حکومت کی جانب سے فوری کارروائی نہ ہونے کی صورت میں ملک گیر شٹر ڈاؤن کی دھمکی بھی دی گئی۔ انہوں نے تمام سیاسی جماعتوں سے مطالبہ کیا کہ عثمان ہادی کے قتل کے مقدمے میں متحد ہوں۔

دھرنے کے دوران انقلاب منچہ نے اپنے تین نکاتی مطالبات کو دہرایا، جن میں تیز رفتار ٹرائل ٹربیونل کا قیام اور زیادہ سے زیادہ 30 دن میں مقدمے کا فیصلہ، غیر جانبدار بین الاقوامی اداروں کی شمولیت سے تحقیقات، اور سول و عسکری انٹیلی جنس اداروں میں مبینہ ملوث افراد کی گرفتاری اور سزا، نیز مشیر داخلہ، معاون خصوصی اور مشیر قانون کا استعفیٰ شامل ہیں۔

واضح رہے کہ شریف عثمان ہادی کو 12 دسمبر کو ڈھاکا کے بیجوئے نگر علاقے میں فائرنگ کے بعد شدید زخمی حالت میں ہسپتال منتقل کیا گیا تھا۔ انہیں بعد ازاں سنگاپور منتقل کیا گیا جہاں 18 دسمبر کو دورانِ علاج وہ جاں بحق ہو گئے۔