وزیراعلیٰ خیبر پختونخوا دو روزہ دورے پر لاہور پہنچ گئے

محکمہ داخلہ پنجاب کے جاری کردہ مراسلے کے مطابق وزیراعلیٰ خیبر پختونخوا 26 سے 28 دسمبر تک پنجاب میں قیام کریں گے، اس دوران وہ مختلف سرکاری اور غیر سرکاری سرگرمیوں میں حصہ لیں گے۔

ذرائع کے مطابق وزیراعلیٰ سہیل آفریدی اپنے دورے کے دوران پنجاب اسمبلی جائیں گے جہاں وہ اراکین صوبائی اسمبلی سے ملاقات کریں گے۔ اس کے علاوہ وہ صحافیوں اور طلبہ سے بھی ملاقاتیں کریں گے۔

مراسلے میں مزید بتایا گیا ہے کہ وزیراعلیٰ خیبر پختونخوا کوٹ لکھپت جیل کا دورہ بھی کریں گے۔ یاد رہے کہ پاکستان تحریک انصاف کے رہنما شاہ محمود قریشی، میاں محمود الرشید، اعجاز چوہدری اور عمر سرفراز چیمہ اس وقت کوٹ لکھپت جیل میں قید ہیں۔

پاکستان تحریک انصاف کے مطابق وزیراعلیٰ سہیل آفریدی ایک قافلے کی صورت میں موٹروے کے ذریعے اسلام آباد سے لاہور پہنچے ہیں۔