ابتدائی معلومات کے مطابق 33 سالہ کاشف، جو آن لائن ٹریڈنگ سے وابستہ تھا اور قرض کے شدید دباؤ میں تھا، نے مبینہ طور پر اپنے تین بچوں اور اہلیہ کو زہریلی چیز دے کر خودکشی کی کوشش کی۔ جاں بحق بچوں کی عمریں 7 سال، 4 سال اور ایک سال بتائی جا رہی ہیں۔

پولیس کا کہنا ہے کہ بچوں کو زہر دے کر قتل کیا گیا جبکہ خاتون شیزہ کے سر اور گردن پر تشدد کے نشانات بھی پائے گئے ہیں۔ واقعے کے بعد اہلِ محلہ کی اطلاع پر پولیس موقع پر پہنچی اور بچوں کی لاشوں سمیت میاں بیوی کو تشویش ناک حالت میں ایوب میڈیکل کمپلیکس منتقل کیا گیا۔

ملزم کے قریبی رشتے دار کے مطابق کاشف قرض کی ادائیگی کے حوالے سے شدید ذہنی دباؤ میں تھا اور اس پر ایک کروڑ روپے سے زائد کی رقم واجب الادا تھی۔ کاشف کے موبائل فون سے ملنے والے آخری اسٹیٹس میں اس نے خود کو قصوروار قرار دیتے ہوئے بچوں کی بے گناہی کا ذکر کیا اور ویڈیوز دیکھنے کی اپیل کی۔

کاشف کے کزن کے مطابق دوپہر کے وقت ایک مشتبہ فون کال موصول ہوئی جس کے بعد گھر پہنچ کر دروازہ توڑا گیا تو اندر انتہائی افسوسناک منظر تھا۔

پولیس کا کہنا ہے کہ واقعے کی ہر پہلو سے تفتیش کی جا رہی ہے جبکہ رشتے داروں کے مطابق میاں بیوی کے درمیان گھریلو جھگڑوں کی اطلاعات بھی سامنے آئی ہیں۔ واقعے نے علاقے میں شدید صدمے اور خوف کی فضا قائم کر دی ہے۔