ہرنائی،کوئلہ کان میں مٹی کا تودہ گرنے سے ایک کان کن جاں بحق

ہرنائی ،شاہرگ کے علاقے میں واقع ایک کوئلہ کان میں مٹی کا تودہ گرنے سے ایک کان کن جان کی بازی ہار گیا۔ ریسکیو حکام کے مطابق حادثہ گیلانی کول کمپنی کے زیرِ استعمال کوئلہ کان میں اس وقت پیش آیا جب اچانک کان کے اندر مٹی کا تودہ گر گیا اور ایک مزدور اس کے نیچے دب گیا۔

جاں بحق ہونے والے کان کن کی شناخت مومن خان ولد خیراتی کے نام سے ہوئی ہے، جو قوم سواتی سے تعلق رکھتے تھے اور ضلع شانگلہ کے رہائشی تھے۔ ریسکیو ذرائع کے مطابق متوفی کی عمر تقریباً 55 برس تھی۔

اطلاع ملتے ہی ریسکیو ٹیم موقع پر پہنچ گئی اور امدادی کارروائی کے بعد لاش کو کان سے نکال کر سول ہسپتال شاہرگ منتقل کیا گیا، جہاں قانونی ضابطے پورے کرنے کے بعد میت ورثاء کے حوالے کر دی گئی۔

واقعے کے بعد علاقے میں سوگ کی فضا قائم ہے جبکہ کان کنوں کے تحفظ سے متعلق خدشات ایک بار پھر سامنے آ گئے ہیں۔