نوشہرہ میں سی این جی اسٹیشن میں آتشزدگی،4 افراد زخمی

خیبرپختونخوا کے ضلع نوشہرہ میں ایک سی این جی اسٹیشن میں آگ لگنے کا واقعہ پیش آیا، جس کے نتیجے میں چار افراد جھلس کر زخمی ہو گئے۔

ڈی ایس پی نوشہرہ جواد خان کے مطابق آتشزدگی کے بعد فوری طور پر امدادی کارروائیاں شروع کی گئیں۔ آگ کے باعث زخمی ہونے والے چاروں افراد کو تشویشناک حالت میں پشاور کے اسپتال منتقل کر دیا گیا ہے۔

پولیس کے مطابق آگ لگنے سے سی این جی اسٹیشن میں کھڑی دو کاریں، دو موٹر سائیکلیں اور ایک رکشہ بھی جل کر تباہ ہو گیا۔ واقعے کے دوران آگ نے دیکھتے ہی دیکھتے پورے اسٹیشن کو اپنی لپیٹ میں لے لیا اور سی این جی اسٹیشن مکمل طور پر تباہ ہو گیا۔

ڈی ایس پی جواد خان کا کہنا ہے کہ ریسکیو اور فائر بریگیڈ کی ٹیموں نے تقریباً ایک گھنٹے کی مسلسل کوشش کے بعد آگ پر مکمل طور پر قابو پا لیا۔ واقعے کی وجوہات جاننے کے لیے تحقیقات کا آغاز کر دیا گیا ہے۔