پنجاب میں شدید دھند کے باعث موٹرویز بند

موٹروے پولیس کے مطابق موٹروے ایم تھری کو فیض پور سے رجانہ تک دھند کے باعث بند کر دیا گیا ہے، جبکہ موٹروے ایم فور گوجرہ سے ملتان اور موٹروے ایم فائی ملتان سے ظاہر پیر تک ہر قسم کی ٹریفک کے لیے بند ہے۔

ترجمان موٹروے پولیس کا کہنا ہے کہ قومی شاہراہ پر مانگا منڈی، پتوکی، اوکاڑہ اور ساہیوال سمیت کسوال، اقبال نگر، چیچہ وطنی، میاں چنوں، خانیوال، ملتان، بستی ملوک، لودھراں اور بہاولپور میں بھی شدید دھند چھائی ہوئی ہے۔ اس کے علاوہ احمد پور شرقیہ، رحیم یار خان اور صادق آباد میں بھی دھند کے باعث حدِ نگاہ متاثر ہو رہی ہے۔

موٹروے پولیس کے مطابق بعض مقامات پر حدِ نگاہ صفر سے 100 میٹر تک ریکارڈ کی گئی ہے، جو خطرناک حادثات کا سبب بن سکتی ہے۔ ترجمان نے شہریوں کو ہدایت کی ہے کہ دھند کے دوران لین ڈسپلن کی سختی سے پابندی کریں، فوگ لائٹس کا استعمال یقینی بنائیں اور غیر ضروری سفر سے گریز کریں۔

موٹروے پولیس نے مشورہ دیا ہے کہ شہری دن کے اوقات میں سفر کو ترجیح دیں، جبکہ دھند میں محفوظ سفری اوقات صبح 10 بجے سے شام 6 بجے تک ہیں۔