ڈاکٹر وردہ کی پوسٹ مارٹم رپورٹ جاری،موت گلا دبانے سےہوئی

رپورٹ میں بتایا گیا کہ ڈاکٹر وردہ کے دائیں کندھے، دائیں بازو اور دائیں ہتھیلی پر خراشیں موجود تھیں، آنکھوں پر سوجن اور ناک سے خون بہنے کے شواہد بھی ملے ہیں۔ ذرائع کے مطابق مقتولہ بیرون ملک روانگی کے وقت اپنے 67 تولہ سونے کے لیے پریشان تھیں، جس کا فائدہ اٹھاتے ہوئے ملزمہ رِدا نے ڈاکٹر وردہ کا اعتماد حاصل کیا اور سونا اپنے پاس امانتاً رکھنے پر آمادہ کیا۔

ذرائع کے مطابق ملزمہ نے سونا گروی رکھوا کر 50 لاکھ روپے بھی حاصل کیے تھے۔ پولیس کے مطابق ڈاکٹر وردہ کے قتل کیس میں تین ملزمان گرفتار کر لیے گئے ہیں، جن میں مقتولہ کی دوست بھی شامل ہے۔ ڈی پی او ہارون الرشید کا کہنا ہے کہ ڈاکٹر وردہ کو قتل کے بعد ٹھنڈیانی کے قریب دفنایا گیا تھا۔

پولیس تحقیقات جاری ہیں اور مزید شواہد کی بنیاد پر کارروائی عمل میں لائی جا رہی ہے۔