بھارتی وزیر خارجہ کا بیان اشتعال انگیزہے،دفتر خارجہ

ترجمان کے مطابق پاکستان کے ادارے ملک کی خودمختاری اور علاقائی سالمیت کے تحفظ کے لیے پوری سنجیدگی اور عزم کے ساتھ اپنی ذمہ داریاں انجام دے رہے ہیں۔ انہوں نے کہا کہ مئی 2025 کے واقعے نے دنیا کے سامنے پاکستانی افواج کی پیشہ ورانہ مہارت اور دفاعِ وطن کے بھرپور عزم کو ثابت کر دیا، جسے کوئی بھی پروپیگنڈا مہم جھٹلا نہیں سکتی۔

طاہر اندرابی کا کہنا تھا کہ بھارتی قیادت کی جانب سے پاکستان کے اداروں اور قیادت کو نشانہ بنانا دراصل ایک منظم پروپیگنڈا مہم کا حصہ ہے، جس کا مقصد خطے میں بھارت کے عدم استحکام پھیلانے والے اقدامات اور پاکستان میں اس کی ریاستی سرپرستی میں جاری دہشت گردی سے عالمی توجہ ہٹانا ہے۔

دفترِ خارجہ نے کہا کہ بھارتی وزیرِ خارجہ کے اشتعال انگیز بیانات نئی دہلی کی خطے میں امن و استحکام کے حوالے سے عدم سنجیدگی کو بے نقاب کرتے ہیں۔ ترجمان نے مزید کہا کہ پاکستان کی مسلح افواج پر بے بنیاد الزامات لگانے کے بجائے بھارت کو اپنی سرزمین پر پروان چڑھنے والے ہندوتوا نظریے کی سنگین صورتحال کا جائزہ لینا چاہیے، جس نے ماورائے عدالت کارروائیوں، ہجوم کے ہاتھوں قتل، بلاجواز گرفتاریوں اور عبادت گاہوں کی مسماری جیسے واقعات کو جنم دیا ہے۔

انہوں نے کہا کہ بھارتی ریاست اور قیادت مذہب کے نام پر پروان چڑھنے والی اس انتہا پسندی کے اثر میں آچکی ہے، جبکہ پاکستان بقائے باہمی، مکالمے اور سفارت کاری پر یقین رکھتا ہے۔ ترجمان نے واضح کیا کہ پاکستان اپنے قومی مفادات اور خودمختاری کے تحفظ کے لیے متحد، مضبوط اور پُرعزم ہے۔