شاعر و ادیب عبدالعلیم صدیقی کی علمی و ادبی خدمات

شاعر اور ادیب۔ ابتدائی تعلیم حاصل کرنے کے بعد آپ نے بی اے الہٰ آباد یونیورسٹی سے کیا۔ یہ وہ زمانہ تھا جب آپ نے تاریخ اور فارسی کے مضامین میں خصوصی دلچسپی کا مظاہرہ کیا’ اِسی دوران آپ شعبہ صحافت سے منسلک ہوئے اور روزنامہ "شفق” میں معاون مدیر کی حیثیت سے اپنی عملی زندگی کا آغاز کیا۔ قیامِ پاکستان کے وقت عبدالعلیم صدیقی اِسی جریدہ کے مدیر بن چکے تھے لیکن آپ ہندوستان چھوڑ کر پاکستان آ گئے۔ یہاں آپ نے درس و تدریس کا انتخاب کیا اور ابتدا میں گورنمنٹ انٹر کالج’ راولا کوٹ میں انگریزی کے شعبہ سے منسلک ہوئے۔ پنجاب یونیورسٹی’ لاہور سے اُردو میں ایم اے کرنے کے بعد آپ نے گورنمنٹ کالج’ باغ اور گورنمنٹ کالج’ پلندری میں خدمات سر انجام دیں۔ آپ کو اقبالیات سے خاصا شغف تھا۔ آپ نے علامہ اقبال کے فارسی کلام کو اُردو میں ترجمہ کیا ۔فارسی کلام کے یہ اُردو تراجم جہانِ خودی‘ عرفانِ بے خودی’ نوائے شرق’ نغمہ سروش’ سیرِ افلاک’ کیا رنگ ہو تدبیر کا اور ارمغانِ مشرق کے عنوانات سے شائع ہوئے۔ بعد ازاں اِن تمام مجموعوں کو یکجا کرکے "اُردو ترجمہ:کلیاتِ اقبال” کے عنوان سے شائع کیا گیا۔ آپ کی علمی و ادبی خدمات کے اعتراف میں حکومتِ پاکستان نے آپ کو تمغہ امتیاز سے نوازا۔ لاہور سے ماورا اور وادئ نیلم سے میرپورہ کالج نےاپنے جریدہ بساط کا خصوصی "پروفیسر عبدالعلیم صدیقی نمبر” کا اجرا کیا۔ آپ کا شعری مجموعہ "نہاں خانہ دل” بعد از وفات شائع ہوا۔ آپ کا انتقال 3 دسمبر 2009ء کو پلندری’ آزاد کشمیر میں ہوا۔