ڈیرہ اسماعیل خان میں سکیورٹی فورسز کے انٹیلی جنس بیسڈ آپریشن کے دوران 22 خوارج ہلاک ہوگئے۔ پاک فوج کے شعبہ تعلقات عامہ (آئی ایس پی آر) کے مطابق 26 نومبر کو سکیورٹی فورسز نے خفیہ اطلاعات کی بنیاد پر کارروائی کی، جس میں بھارتی پراکسی گروپ "فتنہ الخوارج” سے تعلق رکھنے والے خوارج کا ٹھکانا نشانہ بنایا گیا۔
آئی ایس پی آر کے بیان میں کہا گیا کہ آپریشن کے دوران شدید فائرنگ کے تبادلے کے بعد 22 دہشت گرد واصلِ جہنم ہوئے، اور علاقے میں کسی بھی دیگر دہشت گرد کی موجودگی ختم کرنے کے لیے کلیئرنس آپریشن جاری ہے۔
پاک فوج نے کہا کہ ملک میں انسدادِ دہشت گردی کی مہم جاری ہے اور بیرونی پشت پناہی یافتہ دہشت گردوں کے ناسور کو مکمل طور پر ختم کرنے کے لیے بھرپور اقدامات کیے جائیں گے۔
