جمعیت علماء اسلام (ف) نے 27ویں آئینی ترمیم مسترد کر دی

مولانا فضل الرحمان نے کہا کہ اس سے قبل 26ویں ترمیم پر مذاکرات ہوتے رہے اور اس وقت تحریک انصاف بھی مشاورت کا حصہ تھی، لیکن 27ویں ترمیم میں اپوزیشن کو شامل نہیں کیا گیا۔ ان کا کہنا تھا کہ مجوزہ ترمیم سے دستور میں کوئی بہتری نہیں آئے گی اور یہ عوامی مفاد کے تقاضے بھی پورے نہیں کرتی۔ انہوں نے الزام عائد کیا کہ حکومت عدلیہ کو اپنے زیرِ اثر لانے کی کوشش کر رہی ہے، جبکہ اس ترمیم کے بعد آزاد عدلیہ کا تصور متاثر ہوگا۔

جے یو آئی (ف) کے سربراہ نے کم عمر بچوں کے نکاح، گھریلو تشدد اور ٹرانسجینڈرز سے متعلق قانون سازی پر بھی اعتراض کیا اور کہا کہ جائز نکاح کے عمل کو مشکل بنایا جا رہا ہے جبکہ بعض قوانین زنا کے مرتکب افراد کے لیے سہولت پیدا کرتے ہیں۔ انہوں نے کہا کہ آئین پارلیمنٹ کو پابند کرتا ہے کہ قانون سازی قرآن و سنت کے مطابق ہو، ہم آئین کے تحفظ کا حلف اٹھا چکے ہیں۔

مولانا فضل الرحمان کا کہنا تھا کہ عالمی ادارے اور معاہدات ملک کے فیصلوں پر اثرانداز ہو رہے ہیں اور حکمران طبقہ بیرونی دباؤ کے آگے جھکنے پر آمادہ ہے۔ ان کا کہنا تھا کہ برصغیر میں 300 سالہ جدوجہد غلامی کے خلاف تھی، اس لیے ایسی قانون سازی کسی صورت قبول نہیں کی جا سکتی۔