فیض حمیدکورٹ مارشل پرقیاس آرائیاں مناسب نہیں:ترجمان پاک فوج
راولپنڈی میں ڈی جی آئی ایس پی آر لیفٹیننٹ جنرل احمد شریف چودھری نے سینئر صحافیوں کو بریفنگ دیتے ہوئے کہا کہ سابق ڈی جی آئی ایس آئی فیض حمید کے کورٹ مارشل سے متعلق غیر ضروری اندازے لگانا درست نہیں۔ ان کے مطابق یہ ایک باقاعدہ قانونی اور عدالتی عمل ہے، اور جیسے ہی اس سلسلے میں کوئی فیصلہ سامنے آئے گا، عوام کو آگاہ کر دیا جائے گا۔
ترجمان پاک فوج کا کہنا تھا کہ سوشل میڈیا پر کچھ اکاؤنٹس ریاست مخالف بیانیہ پھیلا رہے ہیں، اور ان میں سے بہت سے بیرونِ ملک سے چلائے جا رہے ہیں۔
انہوں نے واضح کیا کہ پاکستان نے افغانستان پر کوئی حملہ نہیں کیا۔ ہماری پالیسی دہشت گردی کے خلاف ہے، افغان عوام کے خلاف نہیں۔ ان کا کہنا تھا کہ پاکستان جب بھی کوئی کارروائی کرے، تو اس کا اعلان کھلے عام کیا جاتا ہے۔
ڈی جی آئی ایس پی آر نے بتایا کہ بلوچستان حکومت نیشنل ایکشن پلان پر عمل درآمد کر رہی ہے اور اس حوالے سے قائم کمیٹیوں میں فوج کے نمائندے بھی شامل ہیں۔
انہوں نے اس بات پر زور دیا کہ افغان حکام دہشت گردوں کے خلاف قابلِ تصدیق اقدامات کریں، کیونکہ ایسی کارروائی کے بغیر کسی بھی قسم کی بات چیت ممکن نہیں۔
