دبئی ایئر شو،بھارتی جنگی طیارہ تیجس گر کر تباہ،پائلٹ ہلاک

دبئی ایئر شو،بھارتی جنگی طیارہ تیجس گر کر تباہ،پائلٹ ہلاک

دبئی میں جاری ایئر شو کے دوران بھارت میں تیار کیا گیا جنگی طیارہ تیجس ایک فضائی مظاہرے کے دوران حادثے کا شکار ہوکر تباہ ہوگیا، جس کے نتیجے میں طیارے کا پائلٹ جان کی بازی ہار گیا۔ بھارتی فضائیہ نے طیارے کے تباہ ہونے اور پائلٹ کی ہلاکت دونوں کی باضابطہ تصدیق کر دی ہے۔

عالمی ذرائع ابلاغ کے مطابق، یہ واقعہ مقامی وقت کے مطابق دو بج کر دس منٹ پر اس وقت پیش آیا جب تیجس ایروبیٹک اسٹنٹ کا مظاہرہ کر رہا تھا۔ حادثے کے باعث ایئر شو کے جاری فضائی ڈسپلے فوری طور پر روک دیے گئے۔

رپورٹس میں بتایا گیا ہے کہ تکنیکی خرابی یا پائلٹ کی ممکنہ غلطی — دونوں پہلوؤں پر تفتیش جاری ہے اور حادثے کی اصل وجوہات جاننے کی کوشش کی جا رہی ہے۔ حادثے کی جگہ سے ملنے والے شواہد بھی جمع کیے جا رہے ہیں۔

بھارتی میڈیا کے مطابق، تباہ ہونے والا یہ طیارہ 2016 سے سروس میں شامل تھا اور بھارت کے مقامی دفاعی پروگرام کے تحت تیار کردہ 4.5 جنریشن جنگی طیاروں میں شمار ہوتا تھا۔
چند روز قبل سوشل میڈیا پر گردش کرنے والی ایک ویڈیو میں اسی طیارے کے فیول ٹینک سے تیل کے اخراج کی شکایات بھی سامنے آئی تھیں، جس پر بھارتی دفاعی تجزیہ کاروں نے تشویش ظاہر کی تھی۔

اطلاعات کے مطابق تیجس طیاروں سے متعلق حادثات کوئی نئی بات نہیں، کیونکہ بھارتی میڈیا کے مطابق دو سال سے کم عرصے میں یہ دوسرا حادثہ ہے۔ مارچ 2024 میں بھی ایک تیجس راجستھان کے علاقے جیسلمیر میں گر کر تباہ ہوگیا تھا۔
خیال رہے کہ تیجس نے اپنی پہلی آزمائشی پرواز 2001 میں مکمل کی تھی۔

دبئی ایئر شو کی تاریخ میں پہلی بار کسی لڑاکا طیارے کے اس نوعیت کے حادثے کی نشاندہی کی گئی ہے، جس کے بعد ایونٹ کی سیکیورٹی اور مینجمنٹ سے متعلق مزید اقدامات زیر غور ہیں۔