پنجاب بھر میں سیکیورٹی ہائی الرٹ

لاہور: اسلام آباد میں ہونے والے حالیہ خودکش حملے کے بعد محکمہ داخلہ پنجاب نے صوبے بھر میں سیکیورٹی ہائی الرٹ کر دی ہے۔ تمام اضلاع میں سیکیورٹی پلان پر مکمل عملدرآمد کی ہدایت جاری کر دی گئی ہے۔

محکمہ داخلہ کے مطابق دہشت گردی کے ممکنہ خطرات کے پیشِ نظر پیشگی اقدامات اختیار کیے جائیں، خصوصاً حساس، اہم اور گنجان آباد علاقوں میں سیکیورٹی مزید سخت کی جائے۔

ذرائع کے مطابق آئی جی پنجاب، سی سی پی او لاہور، تمام آر پی اوز، سی پی اوز اور ڈی پی اوز کو خصوصی احکامات جاری کیے گئے ہیں۔ اس کے علاوہ صوبے بھر کے کمشنرز، ڈپٹی کمشنرز اور ریسکیو اداروں کو بھی ہائی الرٹ رہنے کا حکم دیا گیا ہے۔

محکمہ داخلہ پنجاب نے واضح کیا ہے کہ انتہا پسندی کے خطرات سے نمٹنے کے لیے مربوط، منظم اور فعال اقدامات کیے جائیں تاکہ عوام کے جان و مال کا تحفظ یقینی بنایا جا سکے۔