اسلام آباد کچہری کے باہر خودکش دھماکا،12افراد شہید،27زخمی

پمز اسپتال ذرائع کے مطابق اسپتال میں 12 لاشیں اور 27 زخمی منتقل کیے گئے ہیں، جن میں سے کئی کی حالت تشویشناک بتائی جا رہی ہے۔ دھماکے کے بعد پمز اسپتال میں ایمرجنسی نافذ کر دی گئی ہے۔

دھماکے کی آواز دور دور تک سنی گئی، جس سے قریبی عمارتوں کے شیشے ٹوٹ گئے۔ دھماکے کے باعث تین گاڑیاں تباہ ہوئیں جن میں ایک پولیس اور دو نجی گاڑیاں شامل ہیں۔ جائے وقوعہ کو سیکیورٹی فورسز نے گھیرے میں لے کر علاقے کو سیل کر دیا ہے۔

پولیس اور تحقیقاتی ادارے واقعے کی تحقیقات کر رہے ہیں۔ ابتدائی رپورٹ میں بتایا گیا ہے کہ حملہ آور نے دھماکے میں بال بیرنگز اور بارودی مواد استعمال کیا۔ سیکیورٹی ادارے کیمروں کی مدد سے شواہد اکٹھے کر رہے ہیں جبکہ فارنزک ٹیمیں بھی جائے وقوعہ پر موجود ہیں۔

دھماکے کے بعد دارالحکومت میں سیکیورٹی الرٹ کر دی گئی ہے اور حساس مقامات پر نفری تعینات کر دی گئی ہے۔ حکام کے مطابق واقعے کی مکمل تحقیقات کے بعد مزید تفصیلات جاری کی جائیں گی۔