وانا کیڈٹ کالج میں تمام طلبہ اور اساتذہ بحفاظت ریسکیو

ذرائع کے مطابق سکیورٹی فورسز کا آپریشن انتہائی احتیاط اور حکمتِ عملی کے ساتھ جاری ہے۔ بتایا گیا ہے کہ کالج کے احاطے میں اب بھی تقریباً 300 افراد موجود ہیں، جن کی حفاظت کو یقینی بنانے کے لیے کارروائی سوچ سمجھ کر کی جا رہی ہے۔

سکیورٹی ذرائع کا کہنا ہے کہ افغان خوارج کی موجودگی کے پیش نظر آپریشن میں غیر معمولی احتیاط برتی جا رہی ہے۔ فورسز نے واضح کیا ہے کہ آخری دہشتگرد کے خاتمے تک کارروائی جاری رہے گی۔

یاد رہے کہ گزشتہ روز افغان خوارج نے وانا کیڈٹ کالج کے مرکزی دروازے پر بارود سے بھری گاڑی سے حملہ کیا تھا، جس سے زوردار دھماکا ہوا اور کالج کا مرکزی گیٹ تباہ ہوگیا، جبکہ قریبی عمارتوں کو بھی نقصان پہنچا۔

ذرائع کے مطابق حملہ آوروں کا تعلق افغانستان سے تھا اور وہ وہاں سے ٹیلی فون کے ذریعے ہدایات لے رہے تھے۔ اطلاعات کے مطابق یہ عناصر کالج کی ایک علیحدہ عمارت میں چھپے ہوئے تھے، جو کیڈٹس کی رہائش گاہوں سے کافی فاصلے پر واقع ہے۔

پاک فوج کے جوانوں نے بروقت کارروائی کرتے ہوئے دو خوارجیوں کو ہلاک کیا اور علاقے کو گھیرے میں لے کر کلیئرنس آپریشن شروع کر دیا۔ سکیورٹی فورسز کے مطابق آپریشن اس وقت تک جاری رہے گا جب تک علاقے سے تمام دہشتگردوں کا مکمل خاتمہ نہیں ہو جاتا۔