صدرکو تاحیات گرفتاری سے استثنیٰ دینے کی شق سینیٹ میں منظور
اسلام آباد: سینیٹ نے 27ویں آئینی ترمیم کے ذریعے صدر مملکت کو تاحیات گرفتاری سے استثنیٰ دینے کی شق کثرت رائے سے منظور کر لی۔
چیئرمین سینیٹ یوسف رضا گیلانی کی زیرصدارت اجلاس میں ترمیم کی شقیں مرحلہ وار پیش کی گئیں اور اکثریتی ووٹ سے منظور کی گئیں۔
وزیر قانون اعظم نذیر تارڑ نے آرٹیکل 248 میں ترمیم پیش کی، جس کے تحت صدر مملکت کو تاحیات استثنیٰ حاصل ہوگا۔ ترمیم کے بعد صدر کے عہدے سے سبکدوش ہونے کے بعد بھی ان کے خلاف کسی قانونی کارروائی کی اجازت نہیں ہوگی۔ تاہم، اگر سبکدوش صدر بعد میں کوئی عوامی عہدہ سنبھالتے ہیں تو یہ استثنیٰ ختم ہو جائے گا۔
واضح رہے کہ یہ شق پاکستان پیپلز پارٹی کے مطالبے پر 27ویں آئینی ترمیم کے مسودے میں شامل کی گئی تھی۔
