سینیٹ نے دو تہائی اکثریت سے 27ویں آئینی ترمیم منظور کرلی

جب تحریک پر ووٹنگ ہوئی تو سیف اللّٰہ ابڑو اور جے یو آئی (ف) کے سینیٹر احمد خان نے حکومت کے حق میں ووٹ دیا۔
سینیٹ کے 64 اراکین نے ترمیم کی 59 شقوں کو مرحلہ وار منظور کیا۔

چیئرمین سینیٹ یوسف رضا گیلانی نے رولنگ دیتے ہوئے اعلان کیا کہ 27ویں آئینی ترمیمی بل ایوان سے منظور کرلیا گیا ہے، اس کے حق میں 64 ووٹ آئے اور کوئی ووٹ مخالفت میں نہیں پڑا۔
بل کی منظوری کے بعد سیف اللّٰہ ابڑو اور احمد خان ایوان سے چلے گئے۔

ترمیم کے مطابق، صدرِ مملکت کو تاحیات اور گورنر کو اپنی مدت کے دوران کسی فوجداری کارروائی سے استثنا حاصل ہوگا۔
تاہم، صدارتی مدت ختم ہونے کے بعد اگر صدر کسی پبلک آفس کے عہدے پر فائز ہوں تو استثنا لاگو نہیں ہوگا۔

مزید برآں، وفاقی آئینی عدالت میں تمام صوبوں سے مساوی تعداد میں ججز شامل ہوں گے، جبکہ اسلام آباد ہائیکورٹ سے کم از کم ایک جج تعینات کیا جائے گا۔
اسلام آباد کے ججز کی تعداد صوبوں سے زیادہ نہیں ہوگی۔

آئینی ترمیم کے تحت آئینی عدالت صرف اس وقت ازخود نوٹس لے سکے گی جب کسی معاملے پر باضابطہ درخواست دائر کی جائے۔
ہائی کورٹ کے کسی جج کی منتقلی جوڈیشل کمیشن کے ذریعے ہوگی، اور اگر جج ٹرانسفر سے انکار کرے تو معاملہ سپریم جوڈیشل کونسل میں جائے گا، جہاں جج کو انکار کی وجوہات بیان کرنے کا موقع دیا جائے گا۔