پاکستان اورافغانستان کے درمیان استنبول مذاکرات بے نتیجہ ختم

وفاقی وزیرِ اطلاعات عطا اللّٰہ تارڑ نے سوشل میڈیا پر جاری بیان میں کہا کہ پاکستان اپنے اصولی مؤقف پر قائم ہے کہ افغانستان کی سرزمین سے ہونے والی دہشت گردی پر قابو پانے کی ذمہ داری افغان حکومت پر عائد ہوتی ہے۔

ان کا کہنا تھا کہ افغان طالبان دوحہ امن معاہدے کے تحت کیے گئے اپنے بین الاقوامی، علاقائی اور دوطرفہ وعدوں کی تکمیل میں اب تک ناکام رہے ہیں۔

عطا اللّٰہ تارڑ نے کہا کہ پاکستان افغان عوام کے لیے خیرسگالی کے جذبے کو برقرار رکھے ہوئے ہے اور ان کے لیے ایک پُرامن مستقبل کا خواہاں ہے۔

انہوں نے واضح کیا کہ پاکستان طالبان حکومت کے کسی ایسے اقدام کی حمایت نہیں کرے گا جو افغان عوام یا پڑوسی ممالک کے مفاد میں نہ ہو، جب کہ پاکستان اپنے عوام اور خودمختاری کے تحفظ کے لیے تمام ضروری اقدامات جاری رکھے گا۔

وزیرِ اطلاعات نے مزید بتایا کہ پاکستان نے مذاکرات میں ثالثی پر ترکیہ اور قطر کا شکریہ ادا کیا۔

واضح رہے کہ گزشتہ روز پاکستان اور افغان طالبان کے درمیان استنبول میں مذاکرات کا تیسرا دور شروع ہوا تھا، جس میں دہشت گردی کی روک تھام کے لیے مانیٹرنگ میکینزم کے قواعد و ضوابط پر بات چیت کی گئی تھی۔