امریکا اسرائیل کی حمایت بند کرے،تب مذاکرات ہوں گے،ایران

ایران کے روحانی پیشوا آیت اللہ خامنہ ای نے کہا ہے کہ امریکا جب تک اسرائیل کی حمایت جاری رکھے گا، ایران اس کے ساتھ کسی مذاکرات پر تیار نہیں ہوگا۔ انہوں نے مشرق وسطیٰ میں امریکی فوجی اڈوں کی موجودگی اور اسرائیل کی مسلسل حمایت پر کڑی تنقید کی۔

خامنہ ای نے مزید کہا کہ امریکا کبھی کبھار یہ کہتا ہے کہ وہ ایران کے ساتھ تعاون کرنا چاہتا ہے، لیکن جب تک وہ اسرائیل کی حمایت اور خطے میں مداخلت ختم نہیں کرتا، مذاکرات کا کوئی امکان نہیں ہے۔

انہوں نے واضح کیا کہ ایران اپنی خودمختاری پر کبھی سمجھوتہ نہیں کرے گا اور ایسے ملک کے ساتھ تعلقات قائم نہیں کر سکتا جو خطے میں بدامنی اور اسرائیل کی حمایت کا ذمہ دار ہو۔

واضح رہے کہ گزشتہ ماہ امریکی صدر ڈونلڈ ٹرمپ نے کہا تھا کہ جب ایران تیار ہوگا تو امریکا بات چیت اور تعاون کے لیے تیار ہے، اور ان کی طرف سے دوستی اور تعاون کے دروازے کھلے ہیں۔