کرم:سیکیورٹی فورسز کی کارروائی،7 خوارج ہلاک،6 جوان شہید
خیبر پختونخوا کے ضلع کرم میں سیکیورٹی فورسز نے انٹیلی جنس بیسڈ آپریشن کے دوران بھارتی پراکسی ‘فتنہ الخوارج’ کے 7 خوارج ہلاک کر دیے۔ شدید فائرنگ کے تبادلے میں پاک فوج کے کیپٹن نعمان سلیم سمیت 6 جوان بھی شہید ہوئے۔
پاک فوج کے شعبہ تعلقات عامہ (آئی ایس پی آر) کے مطابق یہ کارروائی ضلع کرم کے جنرل ایریا ڈوگر میں انجام دی گئی۔ شہید ہونے والے دیگر فوجی جوانوں میں حوالدار امجد علی، نائیک وقاص احمد، سپاہی اعجاز علی، سپاہی محمد ولید اور سپاہی محمد شہباز شامل ہیں۔
آئی ایس پی آر نے بیان میں کہا کہ یہ آپریشن قومی ایکشن پلان اور وفاقی اپیکس کمیٹی کے منظور شدہ ویژن "عزمِ استحکام” کے تحت جاری انسداد دہشت گردی مہم کا حصہ ہے۔ آپریشن کے بعد علاقے میں سینٹائزیشن بھی جاری ہے اور سیکیورٹی فورسز ملک سے بیرونی معاونت یافتہ دہشت گردی کے مکمل خاتمے تک موثر کارروائیاں جاری رکھیں گی۔
