وزارتِ عظمیٰ کیلئے کسی امیدوارکااعلان نہیں کیا،پی پی

پاکستان پیپلز پارٹی نے آزاد کشمیر کی وزارتِ عظمیٰ کے لیے ابھی تک کسی امیدوار کا اعلان نہیں کیا ہے۔ ذرائع کے مطابق موجودہ وزیرِ اعظم انوار الحق کے خلاف تحریکِ عدم اعتماد کے موقع پر بھی نئے قائدِ ایوان کا نام خالی رکھا گیا ہے۔

ذرائع کا کہنا ہے کہ صدرِ مملکت آصف علی زرداری کا خصوصی ایلچی نئے وزیر اعظم کے نام کا خط لے کر مظفر آباد جائیں گے۔ تحریکِ عدم اعتماد جمع کرانے سے قبل نئے قائدِ ایوان کا نام درج کرنا لازمی ہے۔

سیکریٹری جنرل پیپلز پارٹی آزاد کشمیر فیصل راٹھور نے بتایا کہ وزیرِ اعظم آزاد کشمیر کے نام کے حوالے سے کوئی حتمی فیصلہ نہیں ہوا۔ انہوں نے کہا کہ پارٹی میں اس حوالے سے مشاورت جاری ہے اور چیئرمین پیپلز پارٹی بلاول بھٹو زرداری ہی وزیرِ اعظم آزاد کشمیر کے نام کا اعلان کریں گے۔