طالبان نے بھارت کی پراکسی جنگ شروع کی ہے،خواجہ آصف

خواجہ آصف نے الزام عائد کیا کہ طالبان نے بھارت کی پراکسی جنگ شروع کی ہے اور اس کے نتیجے میں پاکستان کے کچھ علاقے متاثر اور بچے شہید ہو رہے ہیں۔ انہوں نے کہا کہ طالبان پورے افغانستان پر کنٹرول نہیں رکھتے اور ایک گروپ کی زبانی کیے گئے یقین دہانیوں پر مکمل بھروسہ مشکل ہے۔

وزیر دفاع نے مزید کہا کہ کابل میں بیٹھے افراد کے ذریعے معاملات طے پانے میں رکاوٹ ڈالنے والے عناصر کا کنٹرول بھارت سے کیا جا رہا تھا۔ انہوں نے کہا کہ ملکی مفادات، صوبائی مفادات اور پارلیمانی اعتماد کو ہمیشہ مقدم رکھا گیا اور آئندہ بھی متعلقہ اداروں کو اعتماد میں رکھا جائے گا۔

خواجہ آصف نے واضح کیا کہ اگر مذاکرات کے ذریعے مسائل حل نہ ہوئے تو حالات کشیدگی کی طرف جائیں گے اور ان حالات میں "ہماری اور ان کی کھلی جنگ” ممکن ہو سکتی ہے۔ انہوں نے افغان مذاکراتی وفد کی محنت کی ہمدردی کا اظہار بھی کیا اور کہا کہ ماضی میں طالبان کی حمایت کرنے والوں کے خلاف قانونی کارروائی ضروری ہے، چاہے وہ دنیا میں کہیں بھی ہوں۔

مزید براں، انہوں نے کہا کہ اگر پاکستان اہلِ فلسطین کی حفاظت کے لیے کوئی مثبت کردار ادا کر سکے تو وہ خوش آئند ہوگا۔